Слушам вчера од една професорка, вели „штотуку почина парламентарната демократија во Македонија“. Не сакам да верувам дека има толку слаба меморија, за сето она што му претходеше на вчерашниот ден и изгласувањето на Законот за употреба на јазиците, за да дојде до оваа констатација.
Да се разбереме, парламентарната демократија во Македонија одамна е мртва, она што вчера се случи беше само уште еден парастос. Со мала разлика што од овој момент па натаму ќе имаме можност тоа да го потврдиме на повеќе јазици. Повеќејазична потврда за бедата и грозоморието кое го живееме.
Па така, повеќејазнично (или ако повеќе милувате – двојазично) сè уште ќе бидеме меѓу земјите со најниската минимална плата во регионот и светот.
Повторно ќе враќаме половина од платата на рака. Ќе трпиме секакви понижувања и уцени, само за да можеме дома да однесеме корка леб.
Ќе работиме во двојазични смени и прекувремено за ич пари.
Двојазично ќе ги интерпретираме сите повици за помош на сиромашните, болните, за децата, за жените, за бездомниците…
Ќе имаме можност двојазично да дознаеме колку извршителите ни ги стегнале ортомите околу врат. Двојазични блокирани сметки.
Двојазично ќе се молиме по ходниците на болниците за двојазично да ни кажат дека „нема термин“, ниту лекови и дека „ништо не ви е, ќе ви помине“.
Двојазично ќе се нервираме за условните казни на најголемите криминалци во земјата, додека двојазично сфаќате дека не можете да си ги остварите ниту основните човекови права.
Знаете, и возудухот не е толку загаден кога мерните станици се двојазично испишани.
Децата сè уште ќе ги учат и воспитуваат партиски полуписмени полтрони на сите јазици. И двојазично ќе се бодат по автобуси и улици, затоа што ние ги научивме така.
Процедурално, двојазично може да породолжиме да се мразиме, колнеме и пцуеме, додека двојазично се лажеме дека сме решиле едно тешко поглавје од нашата историја наречена режим, а на фотелјите сè уште седат криминалци и насилници.
Па и пајаците помалку ќе не болат, двојазично.
И повторно ќе „веруваме“ на лагите, двојазични, па наместо вистински претставници на гласот на народот, во т.н. Законодавен дом, ќе гледаме двојазични бурлески во изведба на веќе добро познати аматери…
Ме не фунд кеми мундеси те куптојме са јеми аналфабете дхе те марре не те гјитха гјухет. #дугјухеси
Koneçno imame mozhnost da doznaeme kolku sme nepismeni i glupi na site jazici #dvojaziçnost.
