Не стивнуваат реакциите по сторијата на ЦИВИЛ Медиа за професорката Олга Сејменов од скопската гимназија „Јосип Броз – Тито“, која остана и без работа и без пензија.
Најголема поддршка Сејменов добива од своите поранешни ученички и ученици. Токму оние за кои таа посветено работела со години. Една од нив направи и онлајн петиција „Поддршка за професорката која остана без работа и без пензија“.
„Кога ја видов сторијата на ЦИВИЛ просто не можев да поверувам дека сè уште владее самоволие и кршење на човековите права! Веднаш претпоставив дека се работи за чист реваншизам за времето кога професорката јавно им се спротивставуваше на одлуките на управата на училиштето. Но, дури и да грешам, и да нема никаква позадина оваа одлука на директорката, право на пензија има секој човек, и ме трогна тоа што мојата класна е лишена од ова право повеќе од 8 месеци“, изјави за ЦИВИЛ Медиа иницијаторката на петицијата, Ева Јованова.
Сторијата и петицијата се шират на социјалните мрежи, а коментарите на поранешните ученици зборуваат за тоа каква личност била професорката Сејменов.
„Презираше врски и лигавења, мразеше полтронство и тие што беа такви успеваше да ги одмине, се додека, очигледно, не им стана трн во око. Истрајноста и принципите ја доведоа до ова дереџе, затоа треба сите да и излеземе во пресрет“, напиша една од ученичките на Сејменов.
Некои од нив имале и поинакво искуство со професорката, но сепак ја поддржуваат и се надеваат дека правдата ќе победи.
„Ќе го простам полагањето во втора година, страшно е ова што и се случува!“, пишува друг ученик.
Петицијата досега е потпишана од околу 700 граѓан(к)и.
Сејменов во јули минатата година не можеше да го оствари своето, со закон гарантирано право, на продолжување на Договорот за вработување по навршени 64 години возраст. Oткако беше одјавена од училиштето, сега не може да го оствари ниту своето право на пензија, затоа што училиштето се уште не ги доставило потребните документи до ПИОМ.
ЦИВИЛ – Центар за слобода и понатаму ќе го следи овој случај. Ги повикуваме институциите на брза реакција за решавање на проблемот и соодветна одговорност од оние кои ги прекршиле работничките права на професорката Сејменов.
Маја Ивановска
