Европратеникот Иво Вајгл денеска ќе ги продолжи разговорите со претставниците на парламентарните партии во македонското Собрание за, како што изјави, проектот „Жан Моне“ на Европскиот Парламент.
Вајгл претпладнево во македонскиот Парламент ќе се сретне со координаторите на пратеничките групи на СДСМ, Томислав Тунтев и на ДУИ, Ејуп Алими, како и со Сурија Рушиди од Алијанса на Албанците. Вчера, Вајгл имаше средби со претседателот на Собранието, Талат Џафери, со координаторот на ВМРО-ДПМНЕ, Илија Димовски, на БЕСА, Африм Гаши, како и со Мерал Узеири Ферати од ДПА.
„Би сакал да разговараме за проектот „Жан Моне“ на Европскиот Парламент што значи покревање на дијалогот на политичките играчи во Македонија и интеракција со парламентарците од Европскиот Парламент“, рече кусо европратеникот Вајгл во изјава за медиумите.
Она што го очекува, како што кажа, „е само добро, кога е во Скопје“. На крајот на октомври европратеникот Вајгл во интервју за емисијата „360 степени“ соопшти дека идејата за средба на лидерите на парламентарните партии е ставена на маса за време на неговата последна посета на Скопје, непосредно по изборот на новата влада, а предлогот добил поддршка и од еврокомесарот Јоханес Хан.
Според тројцата европратеници Иво Вајгл, Едвард Кукан и Кнут Флекенштајн кои се иницијатори на идејата, станува збор за неформално отворање процес на дијалог, без присуство на камери, за време на кој би се направил обид да се најде заеднички јазик за одредени прашања. Целта е приближување на ставовите за теми клучни за процесот на интеграција.
Како симбол за заложбите за интеграција во ЕУ, Вајгл, Кукан и Флекенштајн предлагаат овие средби да се одржуваат во Франција, во куќата на таткото на ЕУ, Жан Моне. Европратеникот Вајгл вчера во Скопје имаше средба и со претставници на проектот „Поддршка на Собранието во спроведувањето на реформите“ на Програмата на ЕУ за реформи во Македонија.
По завршувањето на средбите, европратеникот заедно со евроамбасадорот Самуел Жбогар, повторно ќе се сретне со претседателот на Парламентот Талат Џафери, по што се предвидени изјави за медиумите.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
