СООПШТЕНИЕ, 29 септември 2026
ЦИВИЛ – Центар за слобода најостро ги осудува заканите, притисоците и полициското заплашување насочени кон Меморијалниот центар Сребреница – Поточари и кон неговиот директор, Емир Суљагиќ. Најавите за можни упади на специјални полициски сили во институција која го чува споменот на жртвите од геноцидот се не само апсолутно неприфатливи, туку и длабоко вознемирувачки за целиот регион и за демократскиот свет.
Негирањето на геноцидот во Сребреница – само по себе – е злосторство. Тоа е чин на континуирано насилство врз жртвите, врз нивните семејства и врз историската вистина која е недвосмислено утврдена и потврдена од меѓународните судови. Негирањето е последниот стадиум на геноцидот. Но, кога кон ова негирање ќе се додаде и заплашување, се преминува во опасна фаза на активен институционален прогон.
Особено е страшно, парадоксално и крајно лицемерно што овие притисоци доаѓаат токму од институција – Министерството за внатрешни работи на Република Српска – чија примарна и законска обврска е да се грижи за безбедноста и сигурноста на сите граѓани. Наместо да биде гарант за мирот, полицискиот апарат очигледно се користи како инструмент за втерување страв, за политички притисок и за обид да се замолчат оние кои непоколебливо ја говорат вистината. Да се користи институционалната моќ за заплашување на чуварите на меморијата е одлика на антидемократски и ревизионистички политики кои немаат место во современа Европа.
Меморијалниот центар во Сребреница е глобален светилник на сеќавањето, најтешката опомена за човештвото и бастион против заборавот. Затоа, секој напад врз Центарот или врз неговите вработени е директен напад врз основните цивилизациски вредности и врз човековите права.
Мирот и стабилноста на Балканот се можни исклучиво преку искрено соочување со минатото и преземање одговорност, а не преку негово насилно ревидирање и бришење. Повикуваме на силна, недвосмислена меѓународна реакција и регионална солидарност. Институциите, медиумите и граѓанското општество имаат морална обврска да застанат во одбрана на Меморијалниот центар во Сребреница.
Вистината не може да се замолчи. Сеќавањето не може да биде избришано со полициска чизма. Поддршката на ЦИВИЛ за Меморијалниот центар Сребреница и за сите кои бескомпромисно стојат на браникот на правдата е целосна и непоколеблива.
ЦИВИЛ – Центар за слобода
