пишува: САШО ОРДАНОСКИ
Делува непристојно и невкусно ова туркање на лидерот на опозицијата, во последен момент, во првите редови на новопечени и агилни НАТО поддржувачи. Сега, ОТКАКО знамето на Северна Македонија, практично, се дигна на јарбол на самитот во Лондон, навистина е срамота тој да се промовира самиот себеси за многу загрижен околу брзината со која треба собраниски да се ратификува договорот за влез на нашата земја во Алијансата. А сите знаеме (особено протераните пратеници од неговата партија) какви беа ставовите, а и активностите на опозицијата за (не)постигнувањето на Преспанскиот договор со кој, фактички, се овозможи влезот на Македонија во НАТО.
Слична демагогија лидерот на опозицијата практикува и за Договорот со Бугарија – „тази дупка не е дупка“, Договорот е лош и предавнички, ама ние ќе поддржиме сè што е добро во него.
Исто беше и за референдумот: јавно не повикуваме на бојкот, ама „тајно“, на начин сите – од Меркел во Берлин, до Трпе во Подмочани – да разберат дека правиме сè што можеме тој да се бојкотира.
Двојните стандарди се очигледни и за трошоците на државните функционери – „Уаааа, СДСМ се крадци, дрпатори и клептомани!“, ама ВМРО се наплатило двојно и тројно повеќе…
Така е и за Уставниот суд и аболицијата – ние (ВМРО) сме против аболиција на криминалот на нашите функционери, ама ќе направиме сè таа да помине, оти ќе ја условиме со тоа аболицирани функционери да не можат активно да се занимаваат со политика, а го повикуваме и Груевски да се врати во земјава за да се соочи со правдата, иако ако причека уште малку и аболиција ќе дочека, па после законски ќе го пречекаме за заедно да прославиме…
И така натаму. „Шири, шири, весели пешкири“, „Ринге ринге јаја“, се вртат во кругот на слепата улица на политиката во која речиси за НИШТО се нема јасен и недвосмислен, па макар и политички ризичен став. Колку проникливо! Бидејќи, кога се нема јасен став за ништо, не може ни да се погреши нeшто!
Но, не може ни да се погоди ништо. Таквата политика е реактивна, задрта, здодевно цинична, се добива впечаток дека само критикува, дека не е за ништо, а е против сè, дека само тера сеир и фаќа кусур. Сето тоа уште и „завртено“ во центрифугата на нивниот пропаганден апарат кој сè уште функционира подмачкано и под команда, па од политичкото ништо се создава пропагандно НИШТО, исто толку празно, само многу поголемо.
Во речиси сите директни дебатни конфронтации со власта, аргументите на опозицијата се послаби, понеубедливи, понекогаш непостоечки. Само од нивната партиска говорница делуваат супериорно и самоубедено.
Додуша, целата оваа ситуација е резултат и на начинот со кој ВМРО-ДПМНЕ падна од власт. Тие и денеска не се чувствуваат поразени, туку, некако, изиграни, од СДСМ, од „шарените“, од ДУИ, од странците… Бараат реванш за изборите во 2016, под исти услови и правила и во 2020: оваа власт да падне под притисок на скандали и афери! Не да ја заслужат, туку да ја наследат. Без голем ризик.
Можеби така и ќе се случи. Но, ако не се случи, тогаш тие заминуваат во историјата, прилично неславно, без да понудат функционални алтернативи за најголем дел од проблемите произведени во нивно време, со кои се справува сегашната власт. Голем број од граѓаните се незадоволни, а опозицијата упорно не им нуди опција за која би гласале.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
Со преземање на било која содржина објавена на ЦИВИЛ Медиа, спротивно на Условите, се согласувате на ЦИВИЛ да му исплатите надоместок од 25.000 денари во рок од осум дена по преземањето на содржината. Оваа обврска не застарува, а за секое доцнење на исплатата ќе биде пресметана соодветна законска камата.
