Пишува: Сашо Орданоски
[dropcap]Д[/dropcap]обив многу реакции на мојот контроверзен предлог од пред некој ден за национализација на БЕГ, како една од можните стратегиски мерки за решавање на проблемот со загадувањето на Скопје. Со сериозен државен напор, мрежата би можела побрзо да се прошири, а потоа и да се прилагоди на идната гасификација, како трајно решение на една од најгорливите точки за загадувањето на главниот град.
Нормално, веднаш ми рипнаа и оние со аргументите на „европските енергетски политики“, дека Европа нема да дозволи ни „Н“ од национализација – што е, веројатно, точно – но, сериозни луѓе ме потсетуваат и на тоа како, своевремено, за време на една друга влада на СДСМ, беше приватизирана, најблаго речено на законски спорен начин, компанијата со карактеристики на „природен монопол“ којашто ја испорачуваше услугата за парно греење во главниот град. И дека национализацијата, всушност, според нив, би била исправка на една поодамнешна неправда кон граѓаните на Скопје.
Но, не поминаа ни два дена, а Владата најави како планира да ја ВЛОШИ ситуацијата со загадувањето: не само што таму не се размислува за ширење на мрежата на парно греење со нудење на нови погодности и поволности и за постоечките и за нови приклучувања, туку се работи на тоа како да се поскапи услугата за парно, за уште повеќе луѓе да се исклучат од таа мрежа и веќе идната зима да ги активираат оџаците и ќунците низ зградите и куќите!
Според најавите на потпретседателот на Владата Кочо Анѓушев, гледам дека веќе се подготвува шемата за тоа како некој дебело да се „омрси“ од купувањето на калориметрите за парното греење. Оти, ако се плус/минус 50 евра од радијатор, навистина се работи за голема сума на пари – што, на крајот, ќе ја платат граѓаните, ја од свој џеб (можеби, додуше, на рати, преку покачените сметки за парно, што да ти била една голема поволност!), ја преку државниот буџет, односно од „задниот“ џеб на истите тие граѓани, само што така државата ќе има контрола врз тендерите за набавка на калориметрите. Сигурација.
А, гледам и дека една експертска тајфа за молзење пари, со морален капацитет на канализациски стаорци, која со години како пијавица цицаше од „бочните“ криминали на Фамилијата, повторно се разместува со разно-разни маневри, гешефти, понуди и предлози до ресоров на Анѓушев, само за да не пропуштат некој денар ним да не им помине низ раце.
Мене ми изгледа дека надлежните не разбираат колку е важно прашањето за загадувањето и дека се надеваат во ветерот како главен сојузник во расчистување на маглите. Јас не сум експерт за ништо од таа проблематика, но стручен сум за поставување прашања: не е ли попаметно, на пример, прво да се расчисти „воздухот“ околу Дрисла и да се соопшти кои се резултатите од истрагите за незаконскиот увоз и горење на илјадници тони отпад (наводно опасен), а дури потоа да се мисли како на граѓаните уште малку да им се загорчи животот со нови издатоци околу греењето со парно?
Преземањето на оваа содржина е дозволено само по 12 часот, на денот на објавувањето. Потоа, важат вообичаените правила според лиценцата Creative Commons 1.0.
