Потребата од брза разврска на политичката криза, со цел Македонија што поскоро да добие влада, којашто ќе се посвети на клучните прашања за граѓаните и развој на државата бил фокусот на денешната средба на лидерот на СДСМ, Зоран Заев со амбасадорот на Руската Федерација во Македонија, Олег Шчербак.
„СДСМ работи на обезбедување парламентарно мнозинство со цел – формирање стабилна влада, којашто ќе се зафати со сите потребни реформски процеси за да обезбеди добра иднина за граѓаните и за Република Македонија“, рекол Заев на средбата, соопштуваат од СДСМ.
Заев, како што соопштуваат од партијата, истакнал дека СДСМ е определена кон решавање на сите прашања од интерес за граѓаните, преку почитување на Уставот и на законите, „наспроти сегашната практика на Ѓорге Иванов и на власта во заминување, поради кои земјата стана хибриден режим“.
„Демократските процеси во Македонија се почнати. Ним им дадоа поддршка 612.000 граѓани од сите етнички заедници, кои го избраа концепот на заедништво и Македонија – едно општество за сите. Само концептот на еднакви граѓани, правда, квалитетен живот за сите, силно ја гарантира унитарноста и добрата иднина на Македонија“, рекол Заев на средбата со амбасадорот Шчербак.
Тој истакнал дека политичките субјекти во Македонија „преку своите потписи на Договорот од Пржино, ја изразија својата подготвеност за напредок на Македонија низ реформски процеси. Тоа го потврдија мнозинството граѓани преку кредибилните избори. И сега е потребно, сите партии да ја покажат својата совесност и да го овозможат демократскиот развој на Македонија“.