Во правна процедура која започна во 2019 година, Бугарскиот суд ја затвора организацијата „Граѓанско здружение за заштита на основни индивидуални човечки права“, што го отвори македонскиот клуб „Никола Вапцаров“ во Благоевград, објави „360 степени“.
„Во ликвидација“ – пишува во досието на Централниот регистар на Бугарија покрај името на Граѓанското здружение за заштита на основни индивидуални човечки права, организацијата која го отвори клубот „Никола Вапцаров“ во Благоевград, пренесува 360
Уште не стивнаа страстите од двете страни на границата по отварањето на клубот во Благоевград, граѓанското здружение што го отвори клубот „Никола Вапцаров“ во Бугарија заминува во ликвидација.
Причината за затворањето на здружението регистрирано во 2019 година е процесот кој уште истата година го почнува тамошното обвинтелство, но сега добива правна разврска
Со одлуката за ликвидација, што е правосилна од првата половина на месецов, не бил запознаен ниту основачот на македонскиот културен клуб „Никола Вапцаров“, Атанас Мазнев, како што пренесува „360 степени“.
„Јас не знаев, сега станав свесен дека нашето здружение е укинато,“ вели Атанас Мазнев, основач на македонскиот културен клуб „Никола Вапцаров“.
Одлуката е правосилна од првата половина на месецов, а основата е случај отворен од јавното обвинителство во Благоевград со тврдење дека целите на Граѓанското здружение за заштита на основни индивидуални човечки права, регистрирано во 2019 година, се спротивни на бугарските Устав и закони.
„Со сигурност, кога ќе биде официјален клуб ,би присуствувал и ќе присуствувам,“ вели градоначалникот Илко Стојанов.
Отворањето на клубот во Благоевград помина со помали протести и со силно полициско обезбедување, а македонските политичари Христијан Мицкоски од ВМРО-ДПМНЕ и Димитар Апасиев од Левица кои беа присутни на настанот влегоа во вербален дуел со дел од демонстрантите
И отворањето на двата бугарски клуба во Македонија, „Ванчо Михајлов“ во Битола и „Цар Борис Трети“ во Охрид помина со помали протести, но со голем револт на граѓаните затоа што клубовите се именувани по фашистички соработници и негатори на Македонците. Битолскиот клуб беше опожарен брзо по отворањето, а на охридскиот му беше искршена таблата.
Според аналитичарите, отворањето културни клубови помеѓу две држави може да донесе само добро, но начинот на кој се прави тоа во Македонија и во Бугарија е продолжение на досегашните лоши односи меѓу двете земји. Додека траеше бугарското вето, Софија и Скопје беа во постојан вербален дуел и во дипломатски надмудрувања, но „преку границата“, а по прифаќањето на „францускиот предлог“ политичарите ги смирија своите изјави, ама нетрпеливоста се префрли директно на терен, со пресметки помеѓу самите граѓани.
М.Д.
