Володимир Зеленски ги повика лидерите на ЕУ на критичниот самит итно да се согласат на заем од повеќе милијарди евра во замрзнати руски пари за финансирање на воените и економските потреби на Украина, пишува Би-Би-Си.
На Украина ѝ снемуваат пари за неколку месеци, а Зеленски рече дека без инјекција до пролет, Украина „ќе мора да го намали производството на беспилотни летала“.
Поголемиот дел од средствата на Русија во ЕУ во вредност од 210 милијарди евра (185 милијарди фунти; 245 милијарди долари) се во сопственост на белгиската организација „Евроклер“. Досега Белгија и некои други земји-членки изјавија дека се противат на користењето на парите како „заем за репарација“.
Русија ги предупреди лидерите на ЕУ да не ги користат нејзините пари, но полскиот премиер Доналд Туск рече дека тие мора да „се издигнат до оваа прилика“.
Самитот во Брисел доаѓа во клучен момент од војната, а Русија поднесе тужба против „Евроклир“ во московскиот суд во обид да ги врати парите.
Зеленски рече дека Украина дефинитивно се соочува со дефицит од 45-50 милијарди евра следната година, а шефицата на Европската комисија, Урсула фон дер Лајен, вети дека „нема да го напуштиме самитот без решение“. Еден европски владин претставник опиша дека е „претпазливо оптимистичен, а не претерано оптимистичен“ дека ќе се постигне договор.
Сите очи се вперени во белгискиот премиер Барт де Вевер, кој во четвртокот му рече на белгискиот парламент дека ако сè биде договорено и споделено од остатокот од ЕУ, „тогаш ќе скокнеме во бездната заедно со останатите Европејци и ќе се надеваме дека падобранот ќе нè држи“, се наведува во статија на Би-Би-Си.
Во меѓувреме, американскиот претседател Доналд Трамп изјави дека договорот е поблиску од кога било за завршување на војната – која започна со целосната инвазија на Русија врз Украина во февруари 2022 година.
Американските и руските претставници треба да се сретнат во Мајами овој викенд за понатамошни разговори за мировен план, изјави функционер на Белата куќа за новинската агенција АФП. Се смета дека претставникот на Кремљ, Кирил Дмитриев, ќе разговара со претставниците на Трамп, Стив Виткоф и Џаред Кушнер, во Мајами.
Украинските претставници исто така се упатуваат кон САД, а претседателот Зеленски, кој е во Брисел, рече дека на Киев му се потребни парите, или за да ја поддржи својата армија доколку војната продолжи, или целосно да ги насочи средствата за закрепнување: „Тоа е морално, фер и легално, потврдено со експертизата на многу, многу професионалци“.
Русија сè уште не одговорила на најновите мировни предлози, но Кремљ нагласи дека плановите за мултинационални сили предводени од Европа за Украина, поддржани од САД, нема да бидат прифатливи.
Д. Т.
