Украинскиот претседател Володимир Зеленски денеска изјави дека Украина е подготвена да ја унапреди рамката поддржана од САД за завршување на војната со Русија, и да разговара за спорните точки со американскиот претседател Доналд Трамп во разговори за кои рече дека треба да ги вклучат и европските сојузници, објави Ројтерс.
Во говорот пред она што е познато како коалиција на волните, чија копија ја виде Ројтерс, Зеленски ги повика европските лидери да договорат рамка за распоредување „сили за уверување“ во Украина и да продолжат да го поддржуваат Киев сè додека Москва не покаже склоност да ја прекине својата инвазија.
Американските и украинските претставници се обидуваат да ги намалат разликите меѓу нив околу планот на Трамп за ставање крај на најсмртоносниот и најразорниот конфликт во Европа по Втората светска војна, при што Украина е претпазлива да не биде принудена да прифати договор во голема мера врз основа на руски услови, вклучувајќи територијални отстапки.
„Цврсто веруваме дека безбедносните одлуки за Украина мора да ја вклучат Украина, безбедносните одлуки за Европа мора да ја вклучат Европа… Бидејќи кога нешто се одлучува зад грбот на една земја или нејзиниот народ, секогаш постои висок ризик дека едноставно нема да функционира“, рече Зеленски, според текстот од неговиот говор, пренесе Ројтерс.
„Таа рамка е на маса и ние сме подготвени да продолжиме заедно – со САД, со личен ангажман на претседателот Трамп“, додаде тој.
Д. Т.
