Украинскиот претседател Володимир Зеленски во своето обраќање на годишната сесија на Генералното собрание на ОН истакна дека „20. век не научи да не користиме оружје за масовно уништување, а исто така да промовираме нуклеарно разоружување“. Но, како што додаде, Русија се уште има нуклеарни ресурси и „нема право“ да го чува нуклеарното оружје.
Тој изјави и дека постојат договори против оружјето, но нема ограничувања за користење на храната како оружје.
„Од почетокот на војната, украинските пристаништа се блокирани од Русија. Нашите пристаништа на реката Дунав остануваат мети на проектили и беспилотни летала“, рече Зеленски, пренесува Би-Би-Си.
Тој посочи дека Русија ги користи резервите на храна за да изврши притисок врз другите земји да ја признаат анектирана украинска територија и им се заблагодари на земјите што купиле украинско жито за да го спречат тоа.
Украинскиот лидер се осврна и на прашањето за украинските деца кои се однесени во Русија.
Зеленски нагласи дека во минатото терористичките групи киднапирале деца, но во украинската војна киднапирањето и депортацијата на украинските деца во Русија е политика на владата на Путин, нешто што досега не било видено.
„Има десетици илјади деца за кои знаеме дека се киднапирани од Русија и се обидуваме да ги вратиме дома, но времето истекува. Што ќе биде со нив“, праша Зеленски.
Тој додаде дека „децата во Русија ги учат да ја мразат Украина и сите врски со нивните семејства се прекинати“.
„Ова е очигледно геноцид“, додаде Зеленски.
Тој зборуваше и за неговата „формула за мир“, за која смета дека ќе стави крај на војната во Украина.
Зеленски, исто така, рече дека се подготвува мировен самит на кој ќе се поканат присутните да учествуваат на него откако ќе биде потврден терминот.
Тој нагласи дека за единството треба да се разговара отворено, а не зад затворени врати.
„Не може да му се верува на злото, само прашајте го Пригожин“, рече украинскиот претседател, алудирајќи на поранешниот шеф на приватната паравоена група Вагнер, кој му се спротивстави на Путин и загина во авионска несреќа.
Зеленски го заврши својот говор со надеж дека војната на Русија ќе биде последна во светот, со зборовите „Слава на Украина“, по што ја напушти говорницата.
Присутните во салата со половина минутен аплауз го поздравија неговиот говор.
Г. Т.
