Реформите во Министерството за внатрешни работи се спроведуваат согласно препораките на експертската група на Рајнхард Прибе. Владата вчера го усвои полицискиот пакет закони што се однесуваат на измените и дополнувањата во Законот за внатрешни работи, како и на Законот за полиција, информираат од МВР.
Надзорот врз работата на полициските службеници е една од основите во овие измени и како, што велат од МВР, станува збор за проект, на кој се работеше заедно со Советот на Европа и Народниот правобранител.
За реформи на работата на полицијата предвидени се и измени на законите за јавно обвинителство, за народен правобранител.
Покрај внатрешната контрола, која ќе се зајакнува во однос на нивото на професионално и законско работење, предвидена е и надворешна контрола на МВР.
Ќе се формира полициски омбудсман, кој ќе има посебна канцеларија кај Народниот правобранител. Предвидено е и формирање на Совет, составен од невладини организации, кои ќе ротираат и исто така ќе бидат вклучени во надзорот на работењето на полицијата.
Истовремено, како што информираа од МВР во Јавното обвинителство за организиран криминал ќе се формира посебно одделение, кое ќе ја следи исклучиво работата на полицијата. Одделението ќе работи по пријавите, кои ќе се однесуваат на незаконското работење на полицијата, а ќе има и посебен тим иследници за оваа проблематика.
Во измените на Законот за полиција се предвидува ревидирање на одредбата на членот 81, со која се уредени конкретни аспекти во рамки на употребата на средствата за присила од страна на полициските службеници.
Според извори од МВР зголемените рации на полицијата изминатиот период во кафулињата е дел од редовните мерки за заштита на јавниот ред и мир, при што направени се анализи и евидентираните грешки во однесување на полициските службеници се коригирани.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
