На денешната завршна конференција на проектот за ефективна имплементација на европското законодавство во областа на квалитетот на воздухот во Македонија, беа дадени препораки – за зајакнување на меѓусекторската соработка, за интегриран приод и интензивирање на имплементацијата на мерките од Националниот и локалните планови за квалитет на амбиенталниот воздух, за обезбедување одржливост на Националната мрежа за следење и мониторинг на воздухот, за основање Национална лабораторија за мерење на загаденоста и за зголемување на капацитетите на Министерството за животна средина и просторно планирање.
„Степеност на смртност на годишно ниво е во голема мера производ на високата загаденост на воздухот“, изјави денес на завршната церемонија на Твининг проектот за зајакнување на капацитетите за ефективна имплементација на европското законодавство во областа на квалитетот на воздухот, шефот на делегацијата на Европската унија во Македонија, Самуел Жбогар.
Тој потенцираше дека проектот им помага на централните и на локалните власти во Македонија, како приоритет да го постават подобрувањето на квалитетот на воздухот, зашто, според него, „патот до почист воздух во земјата е во рацете на секој граѓанин“. Според него, загадувањето на воздухот и понатаму предизвикува сериозен ризик врз човековото здравје во Македонија и поради тоа, Европската унија над десет години го поддржува јакнењето на националните капацитети за управувањето на квалитетот на воздухот. Жбогар исткна дека е неопходна постојана посветеност на властите и на институциите, на малите и на големите бизниси, како и на самите граѓани за подобрување на квалитетот на воздухот.
Министерот за животна средина и просторно планирање Башким Амети рече дека е испратен предлог до Владата за преземање мерки за намалување на загадувањето на воздухот, така што, МВР ќе воведе регулиран сообраќај по принципот пар-непар.
„Ние, како Министерство, ги преполовивме службените возила, со што сакаме да придонесеме кон решавање на овој проблем, а истото го предложивме да го направат и останатите министерства од Владата. Ова ќе можеме да го постигнеме само со заеднички напори и одговорност за да се обезбеди здрава средина за идните генерации“, рече Амети.
Според изнесените податоци концентрацијата на ПМ 10 и ПМ 2.5 честичките многу често ги надминуваат дозволените граници, а како извор на нивното зголеменото присуство се металуршката индустрија, затоплувањето на домовите, сообраќајот, депониите…
Според министерот Амети, пак, изготвен е извештај за состојбата со квалитетот на возудхот во последните години и плански документи за подобрување на квалитетот на воздухот во Скопје и Тетово, а подобрена е и функционалноста на порталот за квалитет на воздухот. Реализираните проекти за подобрување на животната средина со странските партнери – Финскиот метеоролошки институт и Агенцијата за животна средина на Австрија, ја покажуваат ефикасноста на ваквиот модел на соработка
Проектот „Понатамошно зајакнување на капацитетите за ефективна имплементација на европското законодавство во областа на квалитетот на воздухот“ е поддржан од Европската унија, со 1,1 милион евра и беше имплементиран од мај 2015 до јануари 2017 година, од Министерството за животна средина и просторно планирање, со вклученост и на Институтот за јавно здравје, Град Скопје и други општини.
