Најавениот oд владејачката партија „Живот во Македонија“, мора да започне со стоп на смртноста на родилките и новороденчињата. Рaдикални реформи во здравството треба да бидат императив за властите, колку на централно, толку на локално ниво. Податокот дека на Клиниката за гинекологија минатата година починале 82 новороденчиња за 6 месеци, а од почетокот на годинава до 30 септември 127 новороденчиња, не е само алармантен, туку е потврда дека македонското здравство е во тотален колапс. Простор за алиби нема, по пет месеци нова власт.
Непристојно и крајно несериозно е што министерот за здравство, Арбен Таравари се вклучи во градоначалничката трка. Да прифатиш да бидеш министер за здравство, а министерувањето единствено да го паметат по кантите за ѓубре и двојазичните патокази во Клинички центар, е повеќе од трагично.
Прашање е зошто воопшто овој доктор прифатил да биде министер на витален ресор, а притоа заборавил дека Хипократовата, не е хипокритова заклетва… Фокусот на Таравари е врз новата градоначалничка фотелја, додека здравството го остава на стенд бај. Така е, кога политиката и премногу ќе замеша прсти во виталните сфери на една држава.
Изборите ќе завршат. Најдобро е Таравари да си го оствари планот, да го ослободи министерското столче, во кое не се снајде ни малку. Зашто, на Македонија, веќе не ѝ е потребен ниту нов бескрупулозен Тодоров, ниту амбициозен и конфузен Таравари.
Македонското здравство има потреба од одговорен кадар, и пред сѐ, совесен и посветен министер, којшто ќе ги засучи ракавите, ќе формира реален тим и ќе почне со работата.
Новиот министер треба да се избори во Владата, ветувањата за зголемени плати на докторите да бидат стварност. А, потоа да ги избере и убеди најквалитетните специјалисти во државата дека му се потребни на јавното здравство. Следно, да ја екипира Гинеколошката клиника во Скопје, а потоа гинеколошките оддели и ординации во секој следен град. Не смее да остане општина без доволен број квалитетни гинеколози, значи не со платени дипломи, туку со проверено знаење, со потврдено искуство, докажани стручњаци кои што се посветени на професијата, на здравјето на жената, мајката, на животот на новороденото…
Не помалку битна улога за намалување на смртноста на мајките и бебињата имаат и „бабиците“, медицинскиот кадар, којшто заедно со гинекологот-акушер го водат раѓањето. Дипломите од „ноќно“ стекнати во времето на раскалашноста од владеењето на ВМРО-ДПМНЕ, треба да им се вратат на овие „бабици“, а нивното место да биде пополнето со едуциран и одговорен медицински кадар.
Доста власта си играше со судбините на мајките родилки, со животите на новородените деца. Доволно семејства се завиени во црно, поради алкохолизирани доктори, поради сестри кои повеќе работното време го трошат на Фејсбук, отколку во болничка соба или во родилниот оддел. Доста ни е од министри кои сакаат да ќарат на тендери, кои провизиите ги заменуваат со човечки животи. Доста ни е од недорастени, неодговорни, млади кадри без одговорност, кои живеат само за партиски и политички функции.
Живот во Македонија ќе има тогаш кога ќе се стават на раководни функции разумни луѓе, кои нема да се менуваат, зашто така бара коалицискиот договор. Бараме живот за сите, во секој град, живот во вистинска смисла на зборот.
Кампањите ќе завршат, а потоа преземете ја одговорноста!
Доста е!
