Синоќа на полноќ, Државната изборна комисија, ја затвори опцијата за пријавување на неконзистентни записи во Избирачкиот список, што постоеше како опција на нејзината веб-страница на ДИК. Големиот број на пријави кои пристигнаа на адресата на ДИК, од моментот кога се објави онлајн апликацијата за проверка на Избирачкиот список, е причината која се наведува за ваквиот потег.
„Ова е од причина што за пристигнатите пријави е потребно време Државната изборна комисија соодветно да ги обработи, да ги спореди со податоците од вкрстените проверки и да утврди кои од пријавените случаи треба да бидат предмет на теренска проверка“, стои во соопштението на ДИК.
ЦИВИЛ – Центар за слобода, како граѓанска организација која секојдневно и непрекинато добива информации за бројните неправилности и хаосот што владее во во Избирачкиот списокот, ги повикува сите граѓан(к)и, да продолжат да ги пријавуваат сите недоследности во Избирачкиот список.
„Укинувањето на можноста да пријавуваат на веб-страницата на ДИК, не треба да ги обесхрабри граѓанките и граѓаните, затоа што ЦИВИЛ, продолжува и во следниот период да биде место каде покрај пријавувањето на нерегуларности, можат да ги добијат потребните информации поврзани со нивните права како гласачи, како и информации за престојните предвремени парламентарни избори“, изјави претседателот на ЦИВИЛ, Џабир Дерала.
Ваквите случаи може да се пријават и во ЦИВИЛ со принтскрин и со кратка белешка за што се работи.
Пријавите за фантомски гласачи, како и за други проблеми и нерегуларности, може да се испраќаат на monitor@civil.mk или на телефоните 02/520 9176 или 075/565 830.
ЦИВИЛ го набљудува изборниот процес преку своите проекти „Напред!“, „Слободни избори за слободни граѓанки и граѓани“ и “Граѓански објектив“.
Марија Теговска
