ЦИВИЛ – Центар за слобода им го честита 1 Мај на сите работнички и работници во Република Македонија и во светот. На овој ден, гласно бараме да се забрзаат реформските процеси во полза на работничките права и нивно доследно спроведување. Оваа влада наследи политики и практики од режим кој ги угнетуваше луѓето и ги кршеше нивните основни човекови права и слободи. Тоа наследство мора да се остави во минатото час поскоро, без одложување и без компромиси.
Бараме од синдикатите, граѓанските организации, политичките партии и сите што се декларираат дека се борат за социјална правда и работнички права, од денеска тоа да го прават вистински и искрено или да престанат со лагите и опортунизмот. Бизнис заедницата во земјава мора да стане одговорна и да ги почитува работничките права, особено правото на синдикално организирање.
Работниците во оваа земја имаат најниски плати во Европа. Работниците често не примаат ни минимална социјална, здравствена и правна заштита. Работниците работат во ужасни услови, најчесто без основни средства за заштита на работното место. Мобингот сѐ уште е присутен, а законската заштита од него останува невидлива.
Жените работнички се дополнително лошо третирани, често се понижувани и дискриминирани врз основа на нивната родова припадност, а неретки се случаите на сексуално малтретирање, за што сѐ уште не се осмелуваат да проговорат јавно. Самохраните мајки се во уште потешка положба. Работниците сѐ уште се исплаќаат со пари во готово. Кога се болни, пак, мораат да враќаат кеш пари на своите газди или шефови. Често им подметнуваат разни договори дека се откажуваат од одредени бенефиции и ги принудуваат да ги потпишат.
Честит 1 Мај!