Лоша претстава. Малубројна, уморна публика. гладна и поднапиена од греаната ракија. Кратка плеј листа со многу повторувања (са веома врло патриотским песмама у стилу „крст и кандило“, „клетите шпиони“, „цела да е“…). Актерите – лоши, со пискливи и плачливи гласови, неубедливи, а и самите неубедени во својата мизерна ролја…
Од друга страна, зад кордонот од полициското обезбедување, правната држава профункционира! Насилниците кои ѕверски го нападнаа домот на сите граѓанки и граѓани, Собранието, ги прибра полицијата, а обвинителството побара притвор за сите. Конечно(!), сигнал дека терористичкиот атак и нема да помине неказнето. Лавина од одмазднички, триумфалистички постови во социјалните мрежи. Многу пцости.
И безброј изрази на олеснување, одобрување и поддршка, затоа што правдата е многу дефицитарен производ на полиците во сиромашната македонска политичка продавница.
Сепак, се навикнавме на овие вести да гледаме со претпазливост и недоверба. Судството безброј пати покажа дека е корумпирано. Прашањата на песимистите (со искуство) се нижат. Колку од поттикнувачите и извршителите на крвничкиот напад ќе останат во апс? Колку од нив нема воопшто да ги допре правдата? И најтревожното од сите прашања: Каде се организаторите и спонзорите и дали нив ќе ги допре правдата?
Зоран Заев и Никола Груевски биле на средба во резиденцијата на Ѓорге Иванов синоќа. Врз која основа? Во штурото соопштение на узурпаторот на претседателската функција и катализаторот на кризата во Македонија, стои дека се разговарало за „актуелните случувања и можните решенија за излез од актуелната состојба на напнатост во државата што предизвикува загриженост кај граѓаните“. А бе, ајде!
Да, има загриженост кај граѓан(к)ите. Крајно сме загрижени што криминалците сѐ уште слободно шетаат, а секој обид да се спроведат законите го осуетуваат корумпираното судство, корумпираните политичари и самиот тој, узурпатор кој ја посрамотува земјата секогаш кога ќе отвори уста.
Напнатост во државата? Која напнатост? Онаа предизвикана од стотина луѓе и лоши, а хистерични актери кои пискаат од сцената, користејќи неуспешна мешавина од фашисоидни пораки и делови од нашите извештаи за нивното (да, за нивното!) криминално владеење – таа напнатост?
Зоран Заев е премиер, храбар политички лидер, кој чекореше во илјадните поворки на ненасилната револуција. Нема зошто да го ремети својот ноќен мир за состанок со осомничен за тешки злодела и со узурпатор.
Пак ќе се преговара зад затворени врати и далеку од очите на јавноста? Многу веројатно е дека списокот со жртвувани злосторници и насилници во Собранието е веќе подготвен. Дел од нив ќе останат во притвор, а можеби ќе окркаат и некој месец, па и година затвор. А инспираторите, поттикнувачите и организаторите ќе останат недопрени. Ако тоа се случи, Македонија нема никогаш да стане слободна и демократска земја.
објавено во Плусинфо и Слободен печат (30/11/2017)
