ЦИВИЛ – Центар за слобода со поддршка на Фондацијата „Хајнрих Бел“ од Германија започна со проектот „Општество без граници“ со цел промовирање и едукација на граѓан(к)ите за граѓанската повелба, но и мотивирање за нивно активно вклучување во донесувањето на политичките одлуки на локално и национално ниво.
На осмата годишна конференција „Глобални перспективи“ во Берлин минатата година, на која присуствуваа извршните директори на меѓународни граѓански организации се промовираше „Граѓанска повелба“, документ за правото на граѓаните во формирањето на општествата во кои дејствуваат. Промовирањето на таа повелба низ Македонија, е дел од проектот „Општество без граници“ што го спроведува ЦИВИЛ.
Првото претставување на „Граѓанската повелба“ и промоцијата на документот на македонски, албански, турски, српски/хрватски, влашки и ромски јазик, се случи вчера, точно напладне, во Гостивар, во присуство на медумите и на претставнци на граѓанското општество од овој регион.
Деталната презентација на „Граѓанската повелба“ опфаќаше и информирање на граѓанките и граѓаните на Гостивар и нивна можност за потпишување и поддршка на заложбите за заштита на основните човекови права и слободи, пред сè, во областа на социјалната правда и заштита на работничките права, како и грижата и заштитата на јавниот простор и на животната средина.
Граѓанките и граѓаните имаа можност својата порака да ја пренесат со фото и видео петиција и на тој начин побргу да ја прошират информацијата и пораката до јавноста.
Тимот на ЦИВИЛ Медиа направи анкета на тема социјална правда во гостиварскиот регион. Алармантната состојба која ни ја претставија анкетираните граѓанки и граѓани уште повеќе посочи на потребата од разговор и на преземање конкретни чекори во подобрување на социјалните политики во Македонија.
Во разговорот со Мухамед Точи, претставник на невладината организација „Месечина“, теми беа социјалните права на Ромите. Интервјуто дополнително ќе биде објавено на civilmedia.mk и greencivil.mk.
„Граѓанската повелба“ може да се потпише и онлајн на civiccharter.org.
Б. Јордановска
