ВМРО-ДПМНЕ во две соопштенија за јавноста, денеска побара дополнително објаснување од амбасадата на САД и од Европската комисија, во однос на нивните ставови за најновите политички случувања во Македонија, откако нивниот лидер Никола Груевски, и по дваесет дена од доделувањето на мандатот, не успеа да состави влада.
„Еден ден откако ВМРО-ДПМНЕ јавно се произнесе дека ситуацијата во Македонија е зрела за нови избори, амбасадата на САД во одговор на новинарско прашање ги повика партиите да ги продолжат разговорите за формирање на нова Влада. Со оглед на дискусиите во јавноста кои ги отвори овој став на Амбасадата, ВМРО-ДПМНЕ бара појаснување – дали нивната позиција значи дека САД сугерираат и бараат од Република Македонија и од партиите во парламентот, да нема нови, предвремени, парламентарни избори и дали овој повик може да се толкува како официјален став на новата администрација во САД, партиите со постоечкиот распоред на силите од последните избори да состават нова Влада?“, прашува ВМРО-ДПМНЕ во соопштението упатено до амбасадата на САД во Македонија.
„Македонија нема време за чекање, но портпаролката на Европската унија, Маја Коцијанчич треба да објасни врз основа на кој дел од Уставот на Република Македонија, ЕУ очекува претседателот Иванов да определи лидер за формирање на ‘што е можно поширока Влада’, како што вчера ЕУ објави, преку Коцијанчич. Секоја држава, особено источноевропските земји, има потреба од континуирани реформи, преку промени на законите, за кои понекогаш е потребно и поголемо мнозинство, како што е двотретинското, кое во Македонија е неопходно за промена на некои закони. Сепак, земјите ретко составуваат влади со двотретинско мнозинство. Оттука, би сакале да прашаме дали ЕУ има воспоставена пракса, при секое формирање на Влада во земјите-членки на ЕУ и кандидатите за членство, јавно да повикува на создавање на „што е можно поширока Влада“, или тоа е само исклучок за Македонија“, стои во соопштението на ВМРО-ДПМНЕ, по вчерашната изјава на портпаролката на Европската комисија.
На денешната дебата за Македонија во Комисијата за надворешни работи на Европскиот парламент во Брисел, на дневен ред беше Нацрт-резолуцијата за Македонија која ја изработи Словенецот Иво Вајгл и која треба да биде усвоена во март или април на пленарна седница на ЕП, беше донесен заклучок дека спроведувањето на реформите од Извештајот на Прибе и непреченото функционирање на СЈО, се важни за ЕП, а не тоа кој е на власт во Македонија, „сé додека има јасно мнозинство и стабилна влада која ќе се врати на европскиот пат, која ќе ги спроведе итните реформски приоритети и реформите од Пржино и која нема да оди против работењето на СЈО”.
„По ВМРО-ДПМНЕ сега и друга партија треба да добие шанса да направи влада“, изјавил хрватскиот пратеник во ЕП, Тонино Пицула, а и самиот Вајгл, бил со став дека не е паметно да се повторуваат изборите, за да не се продолжува кризата..