На владиниот настан по повод 100 дена Влада, „100 дена со граѓаните! Грижа. Одговорност. Сигурност.“ свое обраќање имаше претседателот на Владата на РСМ, Зоран Заев, првиот заменик-претседател на Владата Артан Груби, како и заменик-претседателите на Владата Љупчо Николовски и Никола Димитров, а потоа одговараа на прашања од медиуми.
ЦИВИЛ МЕДИА настапи со прашање за хибридните закани, ширењето лажни вести и говор на омраза, односно дезинформациските кампањи:
Прашањето на хибридните закани, особено дезинформациските кампањи е актуелно во целиот свет, а од неодамнешниот извештај објавен од Европскиот парламент, тоа е актуелизирано и кај нас, во Северна Македонија. Што Премиерот и Владата ќе направат во наредниот период за да им застанат на патот на дезинформациските кампањи, кои што беснеат, како што гледаме, лажните вести и говорот на омразата, како и во однос на другите облици на хибридни закани против демократијата?
Премиерот Заев одговори: „Неколку пати имаме одговорено, сакаме да работиме заедно со вас, медиумските работници и граѓанското општество на оваа проблематика, посебно за она што се однесува на лажните вести, присуството во медиумите, главно електронски, пишани, воглавно порталите итн… Едно прашање е безбедноста и сигурноста на државата во одбранбениот и безбедносен систем, овде по НАТО стандардите и протоколите, веќе и меморандум потпишавме, се работи на сајбер безбедноста и верувам дека ќе ги достигнеме многу бргу сите модерни стандарди коишто НАТО земјите членки мора да ги поседуваат, заради нашата безбедност, но и заради безбедноста на земјите членки на НАТО, бидејќи меѓусебно си ја гарантираме таа безбедност.
Во делот на она што се дискутира, барем до сега, јас очекувам малку похрабри чекори и од здружението на новинари, на медиумите, заради одговорноста за ширење лажни вести, заради тоа што, еве лично ќе кажам, од она што го добивам како анализи и од она што читам, следам и се информирам, дефинитивно има многу злокобни и многу злонамерно ширење на лажни вести коишто може да предизвикаат непоправливи последици.
Се работи за медиуми без импресум, медиуми што се присутни во етерот, и коишто покрај тоа што уништуваат чест, достоинство на поединци, уништуваат и институции, уништуваат стратегии на државата, шират омраза којашто дефинитивно има рефлексии и одредени пречки на нашите национални стратешки цели во својата реализација. Барам поддршка и помош од медиумите и здруженијата на медиумите да работиме на ова поле, да воспоставиме европски модели. Да го најдеме тоа што е најдобро во Европа, во демократскиот свет, да го имплеметираме овде, заради тоа што навистина е сериозна закана, и за општеството, и за слободата, и за стратегијата и стратешките определби на државата, но е сериозна закана и за поединецот во нашата држава и нашето општество.“
