Затворот Идризово и лошите услови
Затворениците во Идризово се жалат на ужасно лоши услови, лоша храна, влага, опасност од електричната инсталација. Во ЦИВИЛ Медиа пристигнаа и вознемирувачки фотографии од условите во затворот. Затворениците велат дека почнале штрајк со глад… дел од овие наводи ги демантираше директорот на затворот Идризово. Тој за ЦИВИЛ Медиа изјави дека не е спорно дека постои дел од затворот, што е во план да се затвори, со лоши услови, односно не реновиран, но адаптиран.
Кој, како и кога ќе се најде на регистарот на онлајн медиуми?
Прашањето кое се наметнува е дали во регистарот може да се протнат интернет медиуми кои во минатото ширеле пропаганда, објавувале хушкачки текстови, лажни вести и важеле за непрофесионални? Регистарот ќе биде готов до крајот на ноември. Неговото објавување доцни бидејќи новинарските организации сакаат да им дадат простор на медиумите кои имаат одредени пропусти, како на пример, непотпишувањето на авторите на дел од текстовите. На оваа тема зборуваа претседателката на Управниот одбор на Советот на етика во медиумите, Катерина Синадиновска, извршниот директор на ЗНМ, Драган Секуловски и експертката по медиумско право Снежана Трпевска.
Камчев со кривична пријава за Катица Јанева, нејзиниот син и Лиле Стефанова
Орце Камчев денеска поднел кривична пријава против Катица Јанева, нејзиниот син Лазар Јанев и обвинителката Лиле Стефанова. Според напишаното во пријавата, Камчев ја обвинува Јанева дека создала група во која наводно членувале нејзиниот син и обвинителката Стефанова, а како што пишува, имале за цел да се здобијат со имотна корист и да го оштетат Камчев.
Протест на судската админстрација
Синдикатот на УПОЗ и Здружението на судска админисрација денеска од 9 до 11 часот протестираа пред судот во Штип. Ккао што се изјаснија, тие се незадоволни од дискриминаторскиот однос кон нив во однос на платите, каде покачувања за судии има, а не и за судската служба. Судските административци велат дека дел од судството се и тие дека вработените во судска служба заслужуваат еднаков третман. Колегиумот на судии и Здружението на судии од Основниот кривичен суд во Скопје денеска им дадоа поддршка на судските служеници.
Министерката за правда Рената Дескоска попладнево на прес-конференција ги повика судиите и вработените во судската администрација наместо само за плати да го кренат својот глас и за случаите во кои има застарување на одредени судски постапки или криминал во редовите на судството. Таа рече дека додатоците најверојатно се исплатуваат линеарно заради „мир во куќа“, иако има судии кои се во ризик со одредени предмети и има судии кои не судат доверливи случаи. Истото, рече таа, се однесува и на судската администрација.
ФЛЕШ ВЕСТИ
Здружените граѓански организации и иницијативи по средбата со Пендаровски: Ако во најкраток рок нема конкретни резултати ќе повикаме на граѓанска непослушност
„Катица Јанева пред да биде разрешена испратила барање за буџет за Специјалното јавно обвнителство и согласно законот, Министерството за финансии е должно да го почитува барањето“, изјави министерката за правда Рената Дескоска, одговарајќи на новинарско прашања зошто се предвидени 3,7 милиони евра за СЈО во Буџетот за 2020 година, кога таа институција повеќе не постои.
Државната комисија за спречување на корупција донесе одлуки за затворање на предметите против вицепремиерот Кочо Анѓушев и лидерот на ВМРО-ДПМНЕ Христијан Мицкоски за постапките за добивање концесии за изградба на мали хидроцентрали.
Министерот за надворешни работи Никола Димитров очекува да продолжи поддршката од Латвија, Луксембург и Ирска за нашите евроинтеграции
ИНТЕРВЈУ
Хајредини: Буџетот расте, а средствата за инвестиции се пренаменуваат за тековни трошоци
За новиот предлог-буџет на Владата за 2020 година, ребалансот на буџетот и прогресивниот данок, зборуваме со Џевдет Хајредини, финансиски аналитичар и еден од првите министри за финансии во Македонија.
МИСЛА
Митко Јанчев е од Венера, ВМРО-ДПМНЕ од Марс! е денешната колумна на Сашо Орданоски во која вели: „Митко Јанчев со своето однесување и ставови навистина отскокнува од таа мачна, одмаздничка политика што ја промовира неговата партија, односно нејзините челници кои, за разлика од Јанчев, сите од ред го имаат товарот на „златните години“ од режимот на г. Груевски. И затоа е тој како „диво месо“ во сопствената партија, бидејќи нема обврска ни кон себе ни кон бившото раководство да се занимава со спасување на својата и нивната кожа“.
Денеска од корнер Зоран Иванов за „Врбата кога ќе роди грозје“ или за Христијан Мицкоси на кого „му е кристално јасно дека сега или по изборите сеедно, со каква и со колкава политичка сила и да располага, во Преспанскиот не ќе може ниту запирка да промени. Ова дури и во некакви претпоставени околности во кои би ги добил и посакуваните осумдесет пратеници и Бадинтеровото мнозинство“.
Џевдет Хајредини поентираше со „Зошто Ставрески сакаше да му ја скрши главата на Груевски и други кратки приказни“
Биљана Јордановска
во соработка со Маја Ивановска, Ангела Петровска, Петар Клинчарски, Арбен Зеќири, Ариан Мехмети