ТЕМА НА ДЕНОТ
100 ДЕНА ВЛАДА
На 23 јуни Северна Македонија доби нов состав на Владата предводена од ВМРО-ДПМНЕ и коалицијата на чело со премиерот Христијан Мицкоски.
Владата и коалиционите партнери во изјави и обраќања до јавноста го прикажаа она што за нив претставува успех и постигнување во однос на она што го ветиле на изборите.
Но своја оценка дадоа и експертите и претставниците на опозициските политички партии.
Оценката на Роберт Алаѓозовски, Џелал Хоџиќ, проф. Ана Чупеска, проф. Катрина Колозова, новинарката Соња Танеска, е дека првите 100 дена од новата Влада ни го закочија патот кон ЕУ, врзувајќи не за унгарскиот претседател Виктор Орбан и влошувајќи ги односите со соседите.
„Државата лебди во место без јасна геополитичка насока или подобро речено – без компас“, вели професорката Катерина Колозова.
„Првите 100 дена од мандатот на новата Влада предводена од ВМРО-ДПМНЕ се карактеризираат со сериозни економски пропусти и неодржливи политики“, смета новинарката Соња Танеска.
„Коалицијата на власт, наместо да ги подобри, ги влоши односите со соседите и ЕУ“, е ставот на професорката Ана Чупеска.
„Станува јасно дека дека новата Влада има намера во најмала рака да го замрзне европскиот пат на државата“, вели Џелал Хоџиќ, претседателот на СДА Македонија.
„Владата го почна мандатот трампаво, помпезно и исклучително опасно. Тектонски ја измести надворешната политика, единственото поглавје каде што во евроинтеграцискиот извештај имавме чиста десетка“, смета Роберт Алаѓозовски, поранеше национален координатор за интеркултурализам.
ИЗЈАВА НА ДЕНОТ
Дритон Зенку: За 100 дена се демаскираа лажните ветувања на Мицкоски
„ВМРО-ДПМНЕ, партијата што ја формираше новата влада, останува на своите поранешни опозициски позиции. Употребата на новото име и договорот за добрососедство со Бугарија се двете точки кои новата влада не ги укина, иако моќта што ја има во Парламентот тоа им го овозможува. Ништо не изненадува, бидејќи ваквиот пристап на новата влада беше очекуван. Првиот неуспех на владата е одвојувањето на Албанија на патот кон ЕУ. Ставовите на Мицковски на средбите во странство се најдобар показател за ориентацијата на новата влада. Долгот од Унгарија и посетата на Орбан, односите со Бугарија и Грција, но и официјалниот пристап на Тирана, се првите плодови на новата политика во Скопје, изјави за Фронтлајн политичкиот аналитичар Дритон Зенку.
РЕГИОН
Опозициските демократи бараат од ЕПП поддршка за во Албанија да се врати владеењето на правото
Пратеничката на албанската опозициска Демократска партија, воедно и потпретседателката на ЕПП-жени, Албана Вокши, побарала од Европските народни партии (ЕПП) и европските институции да ги поддржат напорите на опозицијата и граѓаните за да се вратат во Албанија, според неа, владеење на правото, преку почитување на гласот за слободна, независна правда и спроведување на Уставот.
СВЕТ
Победа на екстремната десница во Австрија, првпат по Втората светска војна
Екстремно десничарската Партија на слободата на Австрија (ФПО) победи на парламентарните избори во неделата, што е прва победа на крајната десница на австриските парламентарни избори по Втората светска војна, но неизвесно е дали ќе успее да формира владина коалиција.
ГРАЃАНСКА АКЦИЈА
ПРАШАЊЕ НА ДЕНОТ: Што мислите за првите 100 дена Влада на Мицкоски?
ЦивилМедиа денеска го постави ова прашање и ги повика сите заинтересирани да учествуваат со коментар или порака во која ќе дадат своја оценка за првите 100 ДЕНА ВЛАДА на Мицкоски.
СЛОБОДНА ЗОНА
„Ова пост партискава драмолетка со обвинувања дека не тие сега туку дека некој лани поради ланскиот снег е виновен што албанскиот вагон се откачи од нас и се придвижи кон ЕУ, е само јалов и само паничен обид на власта со вода од каливиот Вардар да си ја плакне совеста што на рамката француска и на нејзиниот автор Макрон, онака гордо, му го покажа средниот прст, демек му ја изигра неговата вековна и светски авторитетната француска дипломатијата“, пишува Зоран Ивнаов ПО ДОПРЕН ГЛАС: „Средниот прст за Макрон, таа мала владина победа е, всушност, големиот пораз за Македонија“.
Подготви: Б. Јордановска
