ТЕМА НА ДЕНОТ: 100 ДЕНА ВЛАДА
-Нашата примарна задача и фокус беше да ги стабилизираме финансиските текови, да ги затвориме буџетските дупки и да се справиме со дефицитите и хаосот оставени од претходната влада. Работиме на враќање на долговите, затворање на задолженоста на институциите и јавните претпријатија и имплементација на конкретни мерки во даночната и социјалната политика. Подготвуваме и екипиравме институции, договараме инвестиции кои се значајни за нашата економија и кои ќе отворат многу нови работни места, и работевме и подготвуваме стотици нови проекти.
Се грижиме, додаде, за сите, за најмладите, за нивното образование и за старите со првата половина од зголемување на пензиите и други нови проекти што ги планираме, рече премиерот Христијан Мицкоски при отчетот за првите 100 дена од работата на новата Влада.
Претседателот на СДСМ, Венко Филипче на прес конференција посветена на првите 100 дена од работата на Владата истакна дека добивме Влада од која досега слушаме само изговори и обвинувања на претходниците за секоја своја неспособност.
„Влада која врши брутална партизација со некомпетентни кадри и секојдневни скандали на министрите. Одговорност за политичарите и функционерите нема, а вистината е заменета со постојана пропаганда“, рече Филипче.
Башким Селмани, универзитетскиот професор, во изјава за Фронтлајн вели дека првите 100 дена Влада донесоа само „солзи, тага, сиромаштија, интриги со соседите и достигнувањата на Албаците, омраза и несигурност“.
Акиф Кариман, лидер на политичката партија АВАЈА, во изјава за ЦивилМедиа оценува дека има лош старт со големи грешки во чекори на ромските претставници во владината коалиција, со чесни исклучоци. Ромските граѓани во овие 100 дена не може да насетат никакви подобрувања, без правец и без план. Во овие 100 дена нема никакви ефекти, освен нивните канцелариски фотели на број, слики и стари приказни (враќање во минатото 2 дел).
ИЗЈАВА НА ДЕНОТ
Меџити оптимист дека уставните измени ќе се спроведат, законот за бранителите ќе остане блокиран
„Претходните влади многу зборуваа, но ништо не направија. Помалку зборуваме и мислам дека интензивно работиме на изнаоѓање решенија и придвижување на ова прашање. Убеден сум и секојдневно работиме во оваа насока“, рече Меџити.
РЕГИОН
Брнабиќ: Предлог-законот за литиум поднесен од пратениците од опозицијата е неуставен и штетен за Србија
Претседателката на Собранието на Србија, Ана Брнабиќ денеска изјави дека Предлог-законот за изменување и дополнување на Законот за рударски и геолошки истражувања поднесен од 86 пратеници од опозицијата е „противуставен и штетен за Србија“, јави дописникот на МИА од Белград.
СВЕТ
Израел започна „ограничена“ копнена офанзива против Хезболах во јужен Либан
Израел започна нова фаза од војната против Хезболах додека израелските одбранбени сили тргнаа на копнен упад во јужен Либан, објави Си-Ен-Ен повикувајќи се на прес-службата на ИД.
ГРАЃАНСКА АКЦИЈА
ПРАШАЊЕ НА ДЕНОТ: Што мислите за отчетот на Мицкоски за 100 ДЕНА ВЛАДА?
ЦивилМедиа денеска го постави ова прашање и ги повика сите заинтересирани да учествуваат со коментар или порака во која ќе дадат своја оценка.
СЛОБОДНА ЗОНА
„Деновите кога немаше „набиена агенда“ да фрла лопати за изградба на некој општински тековен проект, ПР службите му организираа на пример средба со министерот за внатрешни работи во која разговараа за борба против криминалот и безбедноста на граѓаните. Таа пракса за „средба“ стана уште поатрактивна кога се споделуваа фотографии и соопштенија дека „министерот остварил средба со заменик министерот“.
Да се чудиш.
Но, уште позачудувачко е тоа што цела ПР служба се ангажира за да се направи видео најава за гостувањето на премиерот на некој „поткаст““, пишува Дехран Муратов во анализата „100 ДЕНА ВЛАДА: Од лопати и дестабилизација, до нарушена безбедност и – НЕ, благодарам!“.
Д. Муратов
