ВЕСТ НА ДЕНОТ
Судот им изрече доживотна казна на убијците на Вања и Панче
Доживотна казна затвор им беше изречена денеска на обвинетите Љупчо Палевски, Велибор Манев, Боре Видевски и Влатко Кешишев за убиството на Вања Ѓорчевска и Панче Жежовски. Таткото на Вања, Александар Ѓорчевски, кој се товареше дека давал информации за движењето на неговата ќерка, е ослободен од обвинение.
Обвинетите на почетокот од процесот кој траеше нецела година изјавија дека не се чувствуваат виновни.
Во завршните зборови, одбраната на обвинетите побараа ослободителна пресуда, додека, Основното јавно обвинителство побара максимална казна доживотен затвор за Палевски, Кешишев, Видевски и Манев, а за таткото на Вања побара судот да му ја одреди соодветната затворска казна.
Малолетната Вања и велешанецот Панче беа пријавени за исчезнати на 27 и 24 ноември, а на 3 декември 2023 година беа пронајдени мртви во близина на Скопје и Велес
ИЗЈАВА НА ДЕНОТ
Зеленски: Путин не сака да ја запре оваа војна
Нема никакви знаци дека Путин сака да ја запре оваа војна, изјави украинскиот претседател Володимир Зеленски во обраќањето до учесниците на Форумот на НАТО за одбранбена индустрија во Хаг на 24 јуни.
Русија ги отфрла сите мировни предлози, вклучително и оние што доаѓаат од Соединетите Американски Држави. Путин мисли само на војна. Тоа е факт. Можно е тој да го поврзува сопственото политичко опстојување со способноста да продолжи да убива: додека убива – живее. Нашите разузнавачки служби го потврдуваат тоа, нагласи Зеленски.
РЕГИОН
Шмит ги повика властите на Република Српска да се воздржат од понатамошни дејствија по предлог законот за формирање резервни полициски сили
Канцеларијата на високиот претставник (ОХР) во Босна и Херцеговина ги повика властите на ентитетот Република Српска да се „воздржат од понатамошни дејствија“ по предлог-законот за формирање резервни полициски сили, бидејќи станува збор за надлежности на институциите што бараат координирани и сеопфатни одговори на ниво на целата земја.
Денот откако Владата на РС ги усвои измените на Законот за полиција, со кои се овозможува формирање на таканаречениот помошен состав, ОХР изјави дека објаснувањето дадено за формирањето на резервниот состав на полициските сили е нејасно.
СВЕТ
Хашка декларација: Членките на НАТО се обврзаа да инвестираат пет отсто од БДП за одбраната до 2035 година
Земјите членки на НАТО на денешниот Самит во Хаг се обврзаа да инвестираат по пет отсто од националниот БДП годишно за основните потреби за одбраната и безбедноста до 2035 година.
– Обединети пред сериозните безбедносни закани и предизвици, особено долгорочната закана што ја претставува Русија за евроатлантската безбедност и постојаната закана од тероризмот, сојузниците се обврзуваат да инвестираат пет отсто од БДП годишно за основни одбранбени потреби, како и за трошоци поврзани со одбраната и безбедноста до 2035 година, за да ги обезбедат нашите индивидуални и колективни обврски, во согласност со член 3 од Вашингтонскиот договор, се наведува во Декларацијата усвоена на денешниот Самит на НАТО во Хаг.
ПРАШАЊЕ НА ДЕНОТ: Што мислите за мобингот и дискриминацијата по партиска основа?
АЛ-ПРЕС
Редакциски избор од албанските медиуми во регионот:
- „Ерион Велиај неправедно приведен од СПАК“, меѓународните правни служби објавуваат извештај: Неговото апсење пред изборите е пречка за процесот
- Фарсата со пребројувањето на гласовите и 200-те илјади евра на Албанците во ѓубре
- Повторно без договор, косовското собрание и понатаму без претседател
- Арсенијевиќ го нарече откривањето оружје во неговиот објект на север „политички заговор“
- Албанците во револуцијата Трамп
СЛОБОДНА ЗОНА
„Индикативно е дека веднаш по изјавата на Вучиќ за сопирање на извозот на оружје, со посебен осврт на оној кон Тел Авив, според поранешниот началник на Генералштабот на српската војска во време на власта на Тадиќ – Здравко Понош (63) уште истиот ден од Израел дошол боинг кој земал загадочен товар (да напоменеме дека во широк појас околу Источниот Медитеран во овие денови и нема цивилен воздушен сообраќај!).“, пишува Љубомир Костовски во колумната „Вучиќ фатен со рацете во медот“.
Подготви: Д. Тахири
