ТЕМА НА ДЕНОТ
Локални избори без локални теми
Вчера и официјално започна кампањата за локалните избори што ќе се одржат во октомври.
На централниот митинг во Скопје, наместо за локални прашања, лидерот на ВМРО-ДПМНЕ и премиер Христијан Мицкоски ,најмногу зборуваше за „судбината на Македонија“, национални теми и политички пресметки со СДСМ, ДУИ и Левица, наместо на локалните проблеми со кои се соочуваат скопјани.
Тој изборите ги претстави како „финална битка“ за државата, критикувајќи ја резолуцијата на Венко Филипче и најавувајќи реформи во правосудството. Во говорот главно се слушнаа поенти за „црвени линии“ и „длабока држава“, но речиси ништо за секојдневните проблеми на скопјани – сообраќај, отпад, загаден воздух или инфраструктура.
Герасимовски ветува бесплатен оброк, екскурзии, униформи и дополнителни часови за учениците од септември 2026.
„Од наредната година, септември 2026, обезбедуваме бесплатен оброк за сите ученици во целодневна настава, со што, родителите се ослободуваат од финансиски трошоци за храната на своите деца во училиштата. Покрај тоа, на сите ученици од петто до деветто одделение им следува бесплатна неколкудневна екскурзија низ Македонија“. Ова денеска го најави кандидатот за градоначалник на Центар и воедно актуелен татко на општината Горан Герасимовски пред основното општинско училиште „Коле Неделковски“.
Праведно Скопје, кое ќе се развива подеднакво во сите општини. Скопје, чисто, дигитализирано, зелено, модерно, кое ќе биде на сите и со кое ќе се гордеат сите, вети кандидатот за градоначалник на Град Скопје Скендер Реџепи – Зејд од Националната алијанса за интеграција.
За таа цел, рече тој, доколу биде избран на функцијата ќе работи на средување на урбаниот хаос, за намалување на загадувањето на воздухот, нефункционалниот транспорт, на подобрување на условите за младите.
СДСМ нема никаква соработка со ДУИ и Левица. Тоа се само празни, неиздржани обвинувања, рече денеска претседателот на Социјалдемократскиот сојуз на Македонија (СДСМ), Венко Филипче. Тој на прес-конференција повтори дека партијата на локалните избори настапува само во соработка со своите коалициски партнери. На ДУИ и ВМРО-ДПМНЕ им порача да зборуваат за сериозни теми, наместо да се препукуваат и, како што нагласи, да подгреваат национализам.
Пратеникот и лидер на Левица, Димитар Апасиев, ја започна кампањата за локалните избори 2025 со провокативен и вулгарен израз: „Посерисе на мицковизмот – гласај за Левица“.
ИЗЈАВА НА ДЕНОТ
Фон дер Лајен: Европа мора да даде силен и обединет одговор на руските упади со дронови
„Европа мора да даде силен и обединет одговор на руските упади со беспилотни летала на нашите граници“, нагласувајќи ја потребата да се продолжи со изградбата на „ѕид од беспилотни летала“ за да се зголеми безбедноста, порача претседателката на Европската комисија, Урсула фон дер Лајен.
РЕГИОН
Заменичката на генералниот секретар на НАТО, Радмила Шекеринска, за време на Сараевската безбедносна конференција предупреди дека Босна и Херцеговина (БиХ) се соочува со сериозни безбедносни предизвици.
– Сведоци сме на пораст на опасна реторика и политички конфликти. Постојат постојани закани со сецесија, запаливи акции и обиди да се поткопа уставниот поредок и владеењето на правото, истакна Шекеринска, според соопштението на тимот за односи со јавноста на конференцијата.
СВЕТ
Трамп воведува царина од 10% за дрва и 25% за мебел и кујнски елементи, најави 100% царина на филмови направени во странство
Американскиот претседател Доналд Трамп во понеделник нареди значителни нови царини за дрво и разни дрвени производи, вклучувајќи увезено дрво, дрва, кујнски елементи и тапациран мебел – потенцијално зголемувајќи ги трошоците за изградба на домови и мебел, чија цена се зголеми во последните месеци.
ПРАШАЊЕ НА ДЕНОТ
Зошто никој ниту зборува, ниту прави нешто за сиромаштијата во земјата?
ПОТКАСТ: Ескалација на руската хибридна војна: Украина, НАТО и битката за Европа | Eyes on Democracy
Во ова едночасовно разговорно издание, Роџер Касале, поранешен пратеник во британскиот парламент и основач на Вестминстерската алијанса за Украина, модерира длабока, остра и аналитична дискусија со Ана Костјученко, уредничка во Укринформ, и Џабир Дерала, новинар и аналитичар на хибридната војна. Заедно, тие ја разгледуваат актуелната ескалација на руската војна против Украина и пошироката хибридна војна што Кремљ ја води против Европа и светот.
Подготви: Д. Тахири
