ТЕМА НА ДЕНОТ: ЦИВИЛ е дел од европска иницијатива за одбрана на медиумските слободи и демократијата
Неколку водечки европски организации и иницијативи издадоа заедничка изјава со повик за итна акција за одбрана на медиумските слободи и спротивставување на дезинформациите во Европа. ЦИВИЛ е една од шесте организации потписнички на Заедничката изјава, со наслов „На раскрсница: Одбраната на медиумските слободи започнува во Источна Европа“.
Организациите, како што стои и во соопштението за јавноста, предупредуваат на растечките закани од популистички движења, руската хибридна војна и нерегулираните дигитални платформи.
Изјавата беше презентирана на 3 септември за време на снимањето на специјален подкаст и е заеднички поддржана од: Медија дијалог, Германска унија на новинари, Нов европски форум на народите, Глобална иницијатива за одбрана на демократијата, Вестминстерска алијанса за Украина и ЦИВИЛ – Центар за слобода.
На Економскиот форум во Карпач, Полска, овие шест водечки организации со заедничката изјава упатија повик за итна акција за одбрана на медиумската слобода и спротивставување на дезинформациите во Европа. Изјавата, со наслов „На раскрсница: Одбраната на медиумските слободи започнува во Источна Европа“, предупредува на растечките закани од популистички движења, руската хибридна војна и нерегулираните дигитални платформи.
ИЗЈАВА НА ДЕНОТ
„Сè е можно, но мора да признаеме дека Јужна Кореја има голем сојузник – САД. И верувајте, тие имаат бројни системи за противвоздушна одбрана кои ја гарантираат нивната безбедност. Искрено, Украина се стреми да добие сигурни безбедносни гаранции, како што се системите Patriot што ги има Јужна Кореја. Но оваа споредба има свои граници: населението на Северна Кореја е нешто над 20 милиони, додека Русија има повеќе од 140 милиони жители. Заканите од Русија се пет, шест, па дури и десет пати поголеми. Затоа точна реплика на корејскиот модел веројатно нема да одговара на безбедносните потреби на Украина“, изјави украинскиот претседател Володимир Зеленски, додавајќи дека многу го цени економскиот модел на Јужна Кореја.
РЕГИОН
Српскиот претседател Александар Вучиќ на 3 септември изјави дека го искористил присуството на воената парада во Пекинг за да види „што би било интересно да се стекне за потребите на српската армија, така што таа би била одвраќање за секој потенцијален агресор од соседството. Тој рече дека Србија нема да допре никого, но дека ја зајакнува својата армија за да „го заштити својот територијален интегритет“.
СВЕТ
Португалија одбележува национален ден на жалост откако најмалку 15 лица загинаа кога жичницата излета од шините и удри во зграда во Лисабон. Извештаите на локалните медиуми сугерираат дека кабел се олабавил по трасата на железницата, предизвикувајќи таа да ја изгуби контролата – во тек е заедничка истрага меѓу полицијата и компанијата што управува со 140-годишната жичница Глорија.
ПРАШАЊЕ НА ДЕНОТ: Што мислите за воведување на вештачка интелигенција во образованието?
АНАЛИЗИ
„Како што забележа Тимот на ЦИВИЛ за мониторинг на хибридни закани, (ЦХТМ), во дел од медиумите во земјава и во соседството, се дистрибуира изјавата на поранешниот претседател на Полска, Анджеј „Дуда: Зеленски сакаше да ја вовлече Полска во војна со Русија“, или на српски “Duda: Zelenski hteo da uvuče Poljsku u rat sa Rusijom“, преземена од полското политичко списание „Do Rzeczy“, во кое се пренесени одговори на новинарски прашања на поранешниот полски претседател Анджеј Дуда. Иако насловот е дословно преведен, домашните и српските медиуми имаат вметнато сопствена интерпретација при преносот на текстот, при што во своите текстови, за разлика од оригиналниот полски, украинскиот претседател го нарекуваат „шефот на киевскиот режим“, сосема во складот на формулацијата на руските пропагандисти“, се вели во анализата „Рускиот пропаганден наратив за „киевскиот режим“ се одомаќини во дел од македонските и српските портали“.
Подготви: Б. Јордановска
