„Ново коло, нова среќа“, вака гласеше пораката на извлекувањето на ЛОТО бројките во поранешна Југославија. Се чини дека медиумите во дел од поранешна Југославија, поточно Србија и Северна Македонија, на оваа „крилатица“ се повикуваат при секојдневното ширење на руските пропагандни наративи на овие простори.
Така, како што забележа Тимот на ЦИВИЛ за мониторинг на хибридни закани, (ЦХТМ), во дел од медиумите во земјава и во соседството, се дистрибуира изјавата на поранешниот претседател на Полска, Анджеј „Дуда: Зеленски сакаше да ја вовлече Полска во војна со Русија“, или на српски “Duda: Zelenski hteo da uvuče Poljsku u rat sa Rusijom“, преземена од полското политичко списание „Do Rzeczy“, во кое се пренесени одговори на новинарски прашања на поранешниот полски претседател Анджеј Дуда.
Иако насловод е дословно преведен, домашните и српските медиуми имаат вметнато сопствена интерпретација при преносот на текстот, при што во своите текстови, за разлика од оригиналниот полски, украинскиот претседател го нарекуваат „шефот на киевскиот режим“, сосема во складот на формулацијата на руските пропагандисти.
Текстот со руска класификација на украинскиот претседател прво е објавен во српскиот владин медиум „Политика“
Текстот потоа во Северна Македонија прв го пренесува националната агенција Макфакс.
Од Макфакс го преземаат уште неколку македонски портали, повеќето од нив познати на тимот на ЦХТМ од претходен мониторинг за присуството на руските пропагандно-манипулативни наративи, кој го пренесуват текстот во целост, заедно со манипулативниот назив произлезен од руските пропагандисти за претседателот Зеленски.
Во преземениот текст од Макфакс се провлекува уште една додадена реченица која ја нема во оригиналниот текст: „Изјавата на Анджеј Дуда повторно го отвори прашањето како Киев се обидел да го насочи текот на јавната дебата и односите во регионот, особено во време кога војната во Украина веќе длабоко ја подели Европа, според медиумот“, иако во текстот на полскиот медиум од каде што ја преземаат веста , воопшто нема таква конструкција. Очигледно истата е напишана во канцеларијата на начачателот од Црвениот плоштад.
Зголемената руска пропаганда во дел од македонските медиуми во пресрет на локалните избори има повеќекратни цели, кои се во корелација во пошироката стратегија на Кремљ за влијание во Европа, на Балканот, вклучително и во Северна Македонија, членка на НАТО и претендент за влез во ЕУ, при што се стреми да ги прикаже ЕУ како лицемерна, корумпирана или непријателски настроена, а НАТО како „окупатор“, со што треба да го ослаби кредибилитетот на овие институции кај граѓаните.
Целта на зголеменото присуство на руските пропагандни наративи е создавање амбиент на недоверба, нестабилност, назадување на демократските процеси и забавување на евроатлантските интеграции, со што Северна Македонија би останала подложна на руско влијание и ранлива за идни геополитички игри.
Драган Мишев, во соработка со Тимот на ЦИВИЛ за мониторинг на хибридните закани (ЦХТМ)
