ВЕСТ НА ДЕНОТ
Од 1 јануари струјата поскапува – сметките растат од 57 до 900 денари
Регулаторната комисија за енергетика (РКЕ) денеска соопшти дека од 1 јануари 2026 година цената на електричната енергија за домаќинствата ќе се зголеми по блокови, по барање на универзалниот снабдувач ЕВН Хоум.
Според пресметките, домаќинство со потрошувачка само во првиот блок ќе плати за околу 57 денари повеќе, во првиот и втор блок околу 70 денари, додека домаќинства кои трошат во првиот, вториот и третиот блок, што се околу 14.000 домаќинства, ќе платат до 370 денари повеќе месечно. Од таму додаваат дека кај околу 4.400 домаќинства што влегуваат и во четвртиот блок, сметките ќе бидат повисоки и до 900 денари.
РЕГИОН
Здружението на жртви и сведоци на геноцид поднесе кривична пријава до Обвинителството на Босна и Херцеговина против непознати лица – автори, уредници и одговорни лица на Радио телевизија на Република Српска (RTRS) – за емитување програма која, според нив, „етнички ја таргетира бошњачката група и создава наратив што може да произведе национална нетрпеливост и раздор“.
СВЕТ
Доналд Трамп предизвика нов спор со Данска откако назначи специјален претставник за Гренланд, огромниот арктички остров за кој рече дека сака да го анектира. Како одговор на прашање од Би-Би-Си за новата улога на Џеф Ландри, републиканскиот гувернер на Луизијана, Трамп рече дека на САД им е потребен Гренланд за „национална заштита“ и дека „ние мора да го имаме“. Ландри, рече тој, ќе „ја предводи акцијата“ како специјален претставник за Гренланд, полуавтономен дел од Кралството Данска.
ПРАШАЊЕ НА ДЕНОТ: Што ја одбележа 2025 година?
СЛОБОДНА ЗОНА
„Минималната плата не може да се зголеми преку ноќ”, им кажа на работниците премиерот Христијан Мицкоски. Меѓутоа, струјата, лебот, па дури и цените на пакетчињата за децата – тие поскапуваат преку ноќ. И сето тоа додека минималната плата останува закована на истата бројка. Струјата скокна, храната и пијалоците, јајцата поскапеле, горивата, овошјето, зеленчукот „летнаа“ до плафон… ама минималната плата останува иста. Во меѓувреме, функционерите уживаат во своите „регулирани“ зголемувања, бонуси и премии, додека народот брои денови до следната сметка за струја, вода, кредит, телефон, интернет, автобуска карта…“, пишува Дехран Муратов во „Се расте преку ноќ, само не и минималната плата!“
Подготви. Б. Ј.
