ВЕСТ НА ДЕНОТ
Уапсен поранешниот директор на ЈП Државни патишта, Ејуп Рустеми и четири други лица
Против пет физички и едно правно лице е поднесена кривична пријава за злоупотреби при јавна набавка за избор на фирма за физичко обезбедување на 14 наплатни рампи на Јавното претпријатие за државни патишта. Меѓу лицата против кои е поднесена кривичната пријава е и поранешниот директор на Јавното претпријатие за државни патишта Ејуп Рустеми.
– Кривичната пријава е поднесена против Џ.Б. (54) од Кичево, Е.Р. (56) од Тетово, Е.Љ. (61) од Тетово, М.Б. (48) од Скопје и Д.З. (39) од Тетово и против правен субјект од Кичево. Против тогашниот управител на фирмата од Кичево и правното лице е поведена истрага за кривично дело „злоупотреба на постапката за јавен повик, доделување на договор за јавнa набавкa или јавно-приватно партнерство“ од член 275-в од Кривичниот законик, додека за останатите четворица – тогашен директор на претпријатието, еден од потписниците на договорот и двајца надлежни за контрола на реализацијата, се води постапка за кривични дела кои опфаќаат злоупотреба на службена положба и овластување и фалсификување службени исправи, информираат од Министерството за внатрешни работи и од Државното јавно обвинителство.
Станува збор за договор за јавна набавка склучен на 08.08.2022 година со кој осомничениот управител на агенцијата за обезбедување се обврзал две години да врши континуирано физичко обезбедување 24/7 на сите 14 наплатни станици на Јавното претпријатие за државни патишта. Иако согласно потпишаниот договорот бил должен, не се придржувал кон обврската и за целиот период од договорот вршел само делумно физичко обезбедување, најчесто само во прва смена, а фактурирал услуги како да било вршено 24/7 физичко обезбедување за целиот период на договорот се до неговото раскинување.
ИЗЈАВА НА ДЕНОТ
„Не сум сигурен дека цела опозиција сака предвремени парламентарни избори, но доколку се согласат, ние сме секогаш подготвени за избори“, порача денеска премиерот, Христијан Мицкоски.
РЕГИОН
Вучиќ ќе формира Национално движење за народот и државата во кое се добредојдени сите српски патриоти; Движењето за едни е потреба од обединување на патриотите, за други е само уште една форма на манипулација официјален Белград
СВЕТ
Американските власти реагираа во шок на откритијата во магазинот „Атлантик“ дека највисоките членови на Кабинетот на претседателот Доналд Трамп испратиле детални оперативни планови и други, најверојатно, високо доверливи информации за американските воени напади врз Јемен до групна нишка на апликација за пораки на која случајно бил додаден репортер.
ФОРУМ
ПРАШАЊЕ НА ДЕНОТ: Што мислите за „распустот“ што си го даде Собранието?
АЛ-ПРЕС
Здружението на новинари во Албанија го испраќаат случајот „ТикТок“ до Уставниот суд поради создавање опасен преседан и нарушување на слободата на изразување
ДЕЗИНФОРМАЦИИ / ГОВОР НА ОМРАЗА
Фијаско на провладините медиуми: Фатени во лага, во паника бришат постови и спинуваат
„Неформална“ група провладини медиуми вчера побрзаа да објават дека на протестот на иницијативата “Кој е следен” за 59-те жртви од пожарот во кочанската дискотека „Пулс“ имало далеку помала масовност од најавуваната (+инфо); само неколку стотини луѓе се појавија (Лидер); народот ги свати (со В наместо сфати, можеби од брзање, а не поради недоволна писменост н.з.) обидите за злоупотреба на трагедијата, околу 300 луѓе на вечерашниот протест на плоштад (Курир); само стотици граѓани излегоа на марш, препознаени политичките игри за злоупотреба на несреќата (Република).
Ден потоа, откако беа демантирани од видеата споделувани на независни медиуми и социјалните мрежи на кои се гледа учество на илјадници граѓанки и граѓани. Слеани во река од народ како се движат по маршутата од плоштад кон Влада, дел од нив пробаа да ги сокријат објавените дезинформации, бришејќи го објавите, но трагот остана.
Извршниот директор на фудбалскиот клуб Вардар, Миленко Неделковски, посакува смрт на најмилите на тие што протестираат барајќи правда за загинатите и повредените во пожарот во Кочани.
„Да даде Господ на смртта на најмилите на денешниве што протестираа, некои други да злоупотребат и да протестираат. За да видат како е“, пишува меѓу другото Неделковски на својот Фејсбук профил на 24 март 2025, по масовниот протест во Скопје.
Неделковски, во неколку статуси шири дезинформации и го клевети претседателот на ЦИВИЛ, Џабир Дерала, но во последниот статус каде што го спомнува Дерала, се надминал себеси. Лагите на Миленко, верувале или не, одат до таму дека „долга била раката на Џабир“ дека ја контролира навивачката група Комити за пред избори да скандираат против владата, премиерот и ВМРО. Ваква глупост не може да смисли ниту една пропагандна машинерија, или пак може… Ова е навреда за неговите следбеници кои можеби смета дека имаат многу низок капацитет на мозокот и може да им протне секаква лага.
СЛОБОДНА ЗОНА
„Мачно беше да се гледаат сцените во кои цел еден премиер избувнува и се заканува дека ќе влегува по домови и за уши ќе ги вади „одговорните“ со вкалкулирано (а сосема непотребно) вперување на прстот (и) кон Албанците (знаеме како се развиваат наративите после такви изјави). Па божем, тој го разбира гневот, но не можел да ги оправда „оние политички глодари и лешинари кои не сакаат силна влада од ВМРО, бидејќи е браник и последниот столб да не дозволи уништување на Македонија, како држава“. Празно, несоодветно, непотребно, бесмислено. Ништо тој не разбира и веќе ништо не е повикан да оправда или да не оправда. Сите усилби на неговото послушно медиумско-пропагандно стадо не помогнаа да се скрие голотијата на стравот од одговорноста“, пушува Џабир Дерала во колумната „Добредојдовте во свињарникот на пропагандата“!
*
„Значи, Болјарите од Собранието си дадоа распуст, втора недела по ред, вадејќи се на трагедијата во Кочани, и замислете, притоа ги земале предвид чувствата на сите граѓани, изразувајќи почит кон сите загинати“… А сите граѓани, односно обичната раја, чии чувства собраниските Болјари ги земале предвид, ќе си р’мба и во денови на жалост, и по деновите на жалост, ќе тагува, ќе голта солзи, и ќе р’мба. Раја.
А јас па наивен, помислив дека седницата ја закажале за да се договорат, по примерот на некои бугарски пратеници, да издвојат дел од скромната им платичка како донација за настраданите во пожарот во кочанската “дискотека“, пишува Драган Мишев во колумната „Ожалостените“ пратеници на распуст, рајата нека р’мба.
*
„Не се знае дали Стоилковиќ присуствувал на комеморацијата во својство на вицепермиер на Владата на Република Северна Македонија, или како министер за Односи меѓу заедниците, што во двата случаи би значело дека ја претставува и Владата, како и сите граѓани на земјата во која тој делува како висок политичар, и му е доделена позиција на власт. Но, очигледно е дека за него татковина е друга земја, и секако, дека дејствува (не за прв пат и тоа е познато) во спротивна насока од доделената политичка задача.
А можеби е испратен по должност, да му се најде на „брат Вучиќ и братучед Додик“ како поддршка од Северна Македонија, веројатно поканет од таму, за што исто така не се знае, ако е поканет, дали во својство на вицепремиер и министер, или како водач на Демократската партија на Србите во Македонија?
Како и да е…“, пишува Дијана Тахири во коментарот „Кого претставуваше вицепремиерот Стоилковиќ, рамо до рамо со Додик и Вучиќ на комеморација за бомбардирањето на НАТО врз СР Југославија?“.
Д. Муратов
