ВЕСТ НА ДЕНОТ
Комисијата за хартии од вредност на Република Северна Македонија со решение од 19 август 2025 ја запре постапката за преземање на Стопанска банка а.д. Битола по барање на Алта Гроуп ДОО Белград. Одлуката е доставена до банката на 25 август (арх. бр. 02-10332/1). Според образложението, постапката е запрена поради промена на преземачот во рамки на истата групација, а не поради откажување од намерата. Алта Груп навела дека останува при намерата за преземање на Стопанска банка Битола, со тоа што ќе има измена во субјектот кој ќе се јави како формален преземач.
Овој развој следи по анализата СРПСКИ (БУРАЗЕРСКИ) СВЕТ: Ќе добие ли ВМРО-ДПМНЕ своја банка? што ЦИВИЛ ја објави на 23 август, два дена пред соопштувањето за ова решение – анализа во која се разгледуваат политичко-економските импликации од најавеното преземање.
ИЗЈАВА НА ДЕНОТ
„Нашиот страв е: ако ги направиме уставните измени, што ќе се случи ако за шест месеци Бугарија повторно дојде со барања поврзани со историјата, идентитетот или јазикот? Ако утре земјите членки ни кажат дека треба да направиме повеќе во областа на владеењето на правото или доброто управување – тоа го разбираме. И не само што го разбираме, туку го чувствуваме како наша обврска“, изјави министерот за надворешни работи и надворешна трговија Тимчо Муцунски.
РЕГИОН
САД повторно ги одложија санкциите против српската нафтена компанија НИС
Соединетите Американски Држави по шести пат ги одложија санкциите против српската нафтена компанија НИС (Нафтена Индустрија Србија), во сопственост на руската „Газпром“, соопшти српската министерка за енергетика Дубравка Ѓедовиќ-Хандановиќ. Санкциите се одложени до 26 септември, изјави Ѓедовиќ-Хандановиќ, додавајќи дека целта е НИС да биде отстранета од листата на санкции на Канцеларијата за контрола на странски средства при Министерството за финансии на САД.
СВЕТ
НАТО испрати германски борбени авиони да пресретнат руски шпионски авион над Балтичкото Море
Два германски борбени авиони „Еурофајтер“ беа испратени да пресретнат руски извидувачки авион Ил-20 над Балтичкото Море на 26 август. Командата на НАТО даде наредба за пресретнување на Ил-20, кој леташе со исклучени транспондери и без да поднесе план за лет. Германските борбени авиони полетаа од воздухопловната база Росток-Лаге.
ПРАШАЊЕ НА ДЕНОТ: Што мислите за тврдењето на власта дека народот живее побогато од порано?
СЛОБОДНА ЗОНА
„Јагода долго време се думаше како да му испрати тајна порака на Цветко. Затоа го побара најдоверливиот курир Трајче.
„Кај си?“, го праша таа во краткиот разговор на Сигнал.
„Во братска Србија“, ѝ одговори Трајче гордо.
Тој ѝ објасни на претседателката на Нашата Околија – никогаш Северна – дека српскиот четнички војвода во Околијата го испратил во братска Србија, за да му помогне на Вождот од Белиот Град во борбата против западниот империјализам и лудите четници што сакаат да го симнат од престолот“, САТИРА на Џабир Дерала „Јагода и вестите“.
