„Завршуваше првиот изборен круг, кога откривме неколку влијателни и сѐ уште активни министри со политичка злоупотреба на деца за партиски цели,тогаш интервениравме во медиумите. Во понеделникот во 8.30 часот дојде УЈП на врата, си ја плативме слободата со 4.000 евра. Нѐ санкционираа бидејќи не сме платиле персонален данок за обука за деца. Си ги плативме ‘даночните гревови’“, рече Драги Змијанац, претседател на Првата детска амбасада „Меѓаши“, на денешната прес-конференција, посочувајќи на еден сегмент во општеството во кој се загрозени правата и слободите на децата, но и на санкциите што ги трпи организацијата поради решителната битка за заштита на правата на децата.
Во текот на 25-годишното успешно функционирање, не може да се заобиколат придонесот на „Меѓаши“ во борбата против педофилијата и заложбите што резултираа со промена на законската регулатива, со зголемени санкции за извршителите на овие кривични дела.
„Првата детска амбасада има чудна коинциденција. Од почетокот до денес, одговара на сите воени кризи, што директно или индиректно ја погодуваат Македонија и децата во Македонија. Значи, откако се формиравме и организиравме со воздушни и копнени конвои, за поддршка на децата погодени од војната во Босна и Херцеговина, па преку косовската криза, преку конфликтот во Македонија во 2001 година, кога отворивме прифатилиште за деца од внатрешно-раселени лица, до денес, кога работиме за помош и поддршка на децата од Сирија, во бегалската криза. Она што е најбитно за нас е дека сме бескомпромисни борци за заштита на децата и на нивните права и за спречување на злоупотребата и насилството врз нив“, акцентираше Змијанац.
Според почесниот амбасадор на Првата детска амбасада, Коле Ангеловски, „Меѓаши“ го промовираше и Детскиот омбудсман, а оствари соработка и со меѓународни невладини организации.
„Горд сум како амбасадор, зашто ‘Меѓаши’ се здоби со голема доверба од граѓаните во акциите што ги иницира, каков што е случајот со борбата против педофилијата. ‘Меѓаши’ е видлива невладина организација која што го држи високото петто место, а тоа се должи на успехот на реализираните проекти, но и довербата и поддршката од граѓаните“, заклучи Ангеловски.
Во чест на јубилејот, неделава ќе се одржат бројни активности на Првата детска амбасада.
Текст и фото: Моника Талеска
