ВЕСТ НА ДЕНОТ: Панел дискусија на ЦИВИЛ: Општеството во пандемија, изведувачките уметности на раб на опстанокот
Фестивалот на слободата во организација на ЦИВИЛ, по повод Меѓународниот ден на човековите права, денеска продолжи со панел дискусија на тема „Општеството во пандемија, изведувачките уметности на раб на опстанокот“, која се одржа во хотел Парк Резиденс со почеток во 15 часот.
На панелот како говорници учествуваа Јасмина Никуљска од Министерство за култура, Оливер Белопета, Скопје џез фестивал, Ирена Стеријоска, актерка, Никола Наумоски од Град Скопје и Трајко Симоновски, музичар, Здружение на музичари „Музика сега“.
ИЗЈАВА НА ДЕНОТ: Точи: Запознај го другиот за да бидеш побогат
ЦИВИЛНИ АКТИВНОСТИ
Симоновски: Музичарите остануваат без мотив за работа, минималната државна помош не е доволна
Белопета: Културата кај нас во време на пандемија беше максимално жива
Никуљска: Културните дејци се тие кои го одржуваат духот на народот и во време на пандемија
ФЛЕШ ВЕСТИ:
Здравствениот систем го подготвуваме за вакцинација за Ковид-19. Ова ќе биде една од најголемите логистички операции која ќе треба да ја спроведеме. Вакцинирањето ќе го спроведат лекари и медицински сестри кои во овој момент не работат со ковид пациенти, објави на својот фејсбук – профил министерот за здравство Венко Филипче.
Министерката за образование и наука Мила Царовска учествуваше на министерскиот состанок на Платформата за образование и обука, истражување и иновации на земјите од Западен Балкан, во организација на Европската комисија и германското претседателство со Советот на ЕУ, оваа година во виртуелен формат.
Градоначалникот Петре Шилегов и градоначалниците на 10-те скопски општини Гази Баба, Бутел, Чаир, Шуто Оризари, Центар, Карпош, Кисела Вода, Аеродром, Ѓорче Петров и Сарај, денеска потпишаа меморандум за соработка за заедничко вршење на надлежностите во делот на инспекцијата.
Очекуваме до наредната владина седница Министерството за труд и социјална политика (МТСП) да го достави предлогот за недела да биде неработен ден и Владата да донесе одлука, најави денеска владиниот портпарол Муамет Хоџа.
Координаторот на пратеничката група на СДСМ Јован Митрески денеска ја обвини опозицијата предводена од ВМРО-ДПМНЕ дека продолжува со неодговорно и несериозно однесување на штета на граѓаните и институциите, која, како што кажа, поднела бројни несериозни, безобразни и апсурдни амандмани на предлог измените и дополнувањата на Деловникот за работа на Собранието.
СЛОБОДНА ЗОНА
„Зошто се протестите што ги организира опозицијата редовно многу слабо посетени, предвидливо здодевни, политички бледи и тотално непродуктивни? Има неколку можни одговори за тоа.
Прво, сегашното раководство на ВМРО-ДПМНЕ, колективно, е веројатно со најнизок степен на углед и легитимитет меѓу членството, но и во пошироката јавност, во последните 30 години. Дополнително, таа партија секогаш тежнеела кон харизматични лидери, а Мицкоски има врска со харизма колку филе од скуша во конзерва со масло од соја. Треба уште многу лимон, малку нане и бибер, сол по желба и половина литар олив-оил за, откако ќе се изгаси светлото, да почне да глуми порција лосос… Па и со толку дополнителен мастраф, опозициското членство (а и јас!) повеќе милува десетка со кромид и пиво“, пишува Сашо Орданоски во колумната „Протестните дебакли на ВМРО-ДПМНЕ“.
„Кога ќе се погледнеме во огледало, сфаќаме како времето неизбежно истекува и нашите животи се трошат. Ако го погледнеме нашиот град од висококатна зграда, очигледно луѓето изгледаат како мравки, се движат од едно до друго место, мешајќи и обликувајќи го она што го нарекуваме општество“, пишува Сафет Зеќири во „Светот во кој живееме наспроти светот во кој сакаме да живееме“.
„Една од главните причини зошто прогресивниот дел од граѓанското општество и медиумите се на удар е потребата да се заплашат и дискредитираат оние што можат да обезбедат јасна слика за деструктивните политики и практики на одредени центрите на моќ на кои не им одговара продолжување на демократските процеси. Нападот врз прогресивните сили во општеството не е својствен само за Северна Македонија. Илиберални тенденции и хибридни закани против демократијата се бележат во повеќе земји во светот, па така и овде земаат замав“, пишува Џабир Дерала во колумната „Валканото оружје на криминалните структури во политиката“.
„Драг сограѓанину Димче шовинистче, како она рече:
Е, замисли ваква ситуација Димче:
Замисли Левица да има нормален претседател и претставник во Парламентот, наместо шовинист како тебе, и тој да се бори за правата на сите без разлика на етничката, или каква и да е друга определба и да не му смета именуван функционер само затоа што е од друга националност и ништо друго“, пишува Јане Ѓорѓиоски во „Драг сограѓанину Димче шовинистче“.
А. П.
