- Во 2022 година во светот имаше 345 милиони гладни.
- Растот на цените, не достапноста на храната – една од главните причини за гладта во светот, оценува The Economist.
- UNWFP купуваше половина од храната за итна помош во храна од Украина. Руската агресија го оневозможи тоа.
Светот ја дочека 2023 година со голем број кризи, меѓу кои една од најтешките е кризата со глад. Светската програма за храна при Обединетите Нации (UNWFP), задолжена за координација на дистрибуцијата на помош во храна, пресмета дека бројот на луѓе кои се соочуваат со недостаток од храна скокнал од 282 милиони на крајот на 2021 година на рекордни 345 милиони во 2022 година.
50 милиони луѓе на почетокот на 2023 година се на работ на изгладнување. Светот сѐ уште се справува со последиците од економскиот пад како последица од пандемијата „Ковид-19“, но тоа не е единствениот фактор.
Проблемот со недостатокот од храна во светот, во голема мера се должи на нагорната спирала на цените на храната, а не нејзината достапност, оценува еден од најугледните медиуми во светот, The Economist.
Русија и Украина беа меѓу првите пет светски извозници на производи од јачмен, пченка и сончоглед во светот. Така, кога избувна војната, залихите на основна храна беа сериозно погодени. Земјите кои беа најтешко погодени беа меѓу најсиромашните во светот. Судан, Танзанија и Уганда, на пример, се потпираа на Русија и Украина за над 40% од нивниот увоз на пченица.
Сепак, ефектите од недостаток на храна се чувствуваат насекаде. Глобалните цени на храната се зголемија бидејќи другите земји, вклучително и Аргентина и Индија, одговорија со трговски ограничувања. Кризата, меѓу другото, се продлабочи и затоа што Светската програма за храна при ОН не е во можност навреме и целосно да пружи итна хуманитарна помош во храна во земјите најпогодени од глад.
Причината за тоа е што Агенцијата на ОН најчесто купуваше дури половина од пченицата што ја дистрибуира токму од Украина. Тоа стана невозможно поради руската агресија, блокадата на украинските пристаништа, уништувањето на голем дел од посевите, како и масовна кражба што ја спроведоа руските сили од украинските силоси за житарици, за што во повеќе наврати пишуваше ЦивилМедиа.
Сето тоа придонесе кон раст на цените на храната насекаде во светот, така што останува констатацијата дека , сепак, храна во светот има, но е многу поскапа, што ја отежнува работата на хуманитарните агенции и организации.
ЦивилМедиа Деск
