„Општина Центар во своето дејствување креира добри практики и позитивна атмосфера за развој на мултикултурализмот, еднаквоста и недискриминацијата на локално ниво во сите сектори, вели градоначалникот на Општина Центар меѓу другото, на јавниот настан „Граѓански дијалози за меѓуетничките односи: Предизвици и решенија“, што се одржа на 19 јуни 2023, во организација на ЦИВИЛ во соработка со општина Центар, како дел од проектот „Заедно за подобра иднина“.
„Добредојдовте на денешната граѓанска средба во нашата општина. Општина Центар е поддржувач на стратегиите за работа на ЦИВИЛ –Центар за слобода, и затоа денеска, со задоволство сум домаќин на овој јавен настан, каде што со заедничка инволвираност на сите засегнати организации и институции, поединци и медиуми, ќе говориме за важна тема која има за цел да го подобри дијалогот меѓу заедниците, и заеднички да влијаеме за подобро мултикултурно општество.
Општина Центар в о своето дејствување креира добри практики и позитивна атмосфера за развој на мултикултурализмот, еднаквоста и недискриминацијата на локално ниво во сите сектори. Позитивен пример е нашата континуирана соработка со граѓанскиот сектор и финансиската поддршка на здруженија на граѓани, и фондации. Оваа година го зголемивме буџетот, а тоа значи зголемен број проекти, и програмски активности од широк интерес за заедниците од различни групи на дејствување. “, рече градоначалникот Герасимовски во својот воведен говор.
Герасимовски се осврна и на работата на Општина Центар во однос на инклузијата на децата Роми во образовниот систем во самата општина.
„Општина Центар, во соработка со ромскиот Едукативен центар и Министерството за труд и социјална политика, повеќе од десет години успешно го спроведува проектот “Инклузија на децата Роми“ во градинката „Раде Јовчевски Корчагин“, во општина Центар, и ова е уште еден позитивен пример за рушење на бариерите и градење мостови на еднаквост, прифаќање и разбирање на различностите уште од најрана возраст“, посочи Герасимовски.
Д. Тахири
Камера и фотографија: Дехран Муратов
Монтажа: Ариан Мехмети
