ВЕСТ НА ДЕНОТ
Владата денеска на седница донесе одлука со која ќе се намалат цените на над 50 прехранбени производи за најмалку 10 проценти. Референтна цена за намалувањето на цените за 10 проценти е 1 август, а одлуката ќе биде во сила до крајот на ноември годинава. Производите опфатени со одлуката во маркетите ќе бидат означени со гарантирана цена.
„Од утре, па до 30 ноември годинава, 25 категории на производи, односно стотици прехранбени производи, ќе имаат за најмалку 10 отсто пониски цени отколку што имале на 1 август годинава. Тоа го овозможува Одлуката за определување на највисоките цени во трговијата на мало што денеска на седница ја донесе Владата, а за овие производи трговците ќе имаат обврска да ги обележат со натписот „гарантирана цена“, најави денеска министерот за економија Крешник Бектеши, листата на производи која е утврдена денеска ќе стапи во сила откако ќе биде објавена во Службен весник и ќе биде обврска за сите трговци на мало.
ИЗЈАВИ НА ДЕНОТ
Деманти за средби во Будимпешта
„Еднаш рекоа дека се сретнал со Али Ахмети, па рекоа – не, се сретнал со Артан Груби, сега јас сум се сретнал со него! Можеби од четврти пат ќе погодат!“, објави на Фејсбук, министерот за надворешни работи, Бујар Османи, по прозивката од поранешниот член на „огнените“, а сега лидер на новоформираната партија – Демократско движење, Изет Меџити, кој упати јавно прашање до Османи дали бил во службена или приватна посетата во Будимпешта кога се сретна со Груевски.
„Не е точно дека сум имал тајни средби со Али Ахмети и Никола Груевски за Кривичниот законик, изјави поранешниот премиер Зоран Заев за ТВ 24, откако неговиот поранешен коалициски партнер Али Ахмети, истакна дека на тајни средби се догаварале контроверзните измени на Кривичен со кои паѓаат во вода делата за кои се гонат функционери.
ВОЈНА ВО УКРАИНА
Руската пропаганда создаде лажна фотографија со професорите од националниот универзитет Иван Франко во Лвив и Борис Џонсон како поздравуваат со „нацистички поздрав“.
*
Минатава недела беа забележани спектакуларни украински напади на полуостровот Крим, погодувајќи руски воени бродови, подморница, ракетни системи. Проценките за направената штета изнесуваат милијарди фунти и го поставија прашањето: дали Украина се подготвува повторно да го преземе Крим, кој Русија го анектираше во 2014 година?
*
Русија веќе го уништи количеството украинско жито кое би било доволно за да нахрани повеќе од 10 милиони луѓе за една година, изјави американскиот секретар за одбрана Лојд Остин во својот воведен говор на 15-тиот состанок на Контакт групата за одбрана на Украина.
ФЛЕШ ВЕСТИ
ЗДРАВСТВО На Универзитетската клиника за радиотерапија и онкологија (УКРО) ќе се инсталира линеарен аксцелератор за потребите на онколошките пациенти. На клиниката денеска почна деинсталацијата на постојниот систем за радиотерапија, односно линеарниот акцелератор 356, стар околу 20-тина години.
РЕГИОН Работната група на српското Министерство за здравство за справување со состојбите од пандемијата на Ковид донесе препораки за постапување на ниво на примарната здравствена заштита и болничките установи, а една од нив е задолжителното носење заштитни маски во сите здравствени установи.
ЗАКОН Собранието денеска ги изгласа измените на Законот за данок на додадена вредност, со кој се намалува стапката од 18% на 5% за прометот со менструални производи.
AL-PRESS
Редакциски избор од албански медиуми: Курти со остри критики кон Лајчак за соработка со српската страна; Стејт Департментот на страна на Лајчак; во Албанија легализирани онлајн игрите на среќа
СЛОБОДНА ЗОНА
„Грамадата од луѓе, средства и механизми, Црвените нијанси и трансформации, во (секогаш) ЦРВЕНО, ја издигна догмата во триесеттите, а се пренесе и ја учеа генерации и по тоа: догмата не стана мит вон од Руската свест, а денес опоменува за политички далтонизам. Кога го прашав писателот, борец и дипломат Владо Малески, во ТВ Скопје за контекст во неговото дело „Езерко Дримски“, како ни се случи Голи оток кога веќе знаевме за методите на Сталинизмот, умниот интелект цинично заклучи: тогаш не познававме други методи, освен руските“, пишува Борко Зафировски во „Сите бои – ЦРВЕНО“.
Подготви: Б. Јордановска
