Во изминатата недела главни пропагандни теми со кои настапуваше во јавност опозициската ВМРО-ДПМНЕ, беа наводното намигнување и испраќање бакнежи на вицепремиерот за европски прашања, Бојан Маричиќ, кон пратеничката на ВМРО-ДПМНЕ, Дафина Стојановска.
Друга тема со која ВМРО-ДПМНЕ ги доведе граѓаните во заблуда е дека наводно на рафтовите во продавниците е пласирано канцерогено млеко од Србија со афлатоксин М1 над максимално дозволените концентрации.
Исто така куририте објавија вест со манипулативен наслов „Зечевиќ поднел оставка“, колку да се дефокусира јавноста од тоа дека СДСМ демонстрира заедништво.
Нема канцерогено млеко во маркетите
Опозициската партија ВМРО-ДПМНЕ неколку дена неосновано шири паника и ги доведува граѓаните во заблуда дека на рафтовите во продавниците е пласирано млеко од Србија со афлатоксин М1 над максимално дозволените концентрации.
Првиот човек на Агенцијата за храна и ветеринарство, Николче Бабовски ги уверува граѓаните да бидат спокојни бидејќи „канцерогено” млеко со афлатоксин по потекло од Србија нема на маркетите, пришто додаде дека доколку некој купи во маркетите млеко од посочените спорни пратки, со фискална сметка, да го однесе во АХВ.
Бабовски ги отфрли и обвинувањата на ВМРО-ДПМНЕ дека и од домашна млекара во промет е пуштено млеко со афлатоксин.
Дефокус – Зечевиќ поднел оставка
Куририте објавија вест со манипулативен наслов „Зечевиќ поднел оставка“, колку да се дефокусира јавноста од тоа дека СДСМ демонстрира заедништво објавувајќи фотографија од средбата на Димитар Ковачевски и Зоран Заев, на која се и Оливер Спасовски, генералниот секретар Миле Зечевиќ, организацискиот секретар Митко Трајчулески, шефот на премиерскиот кабинет Мартин Попов и Игор Ивановски од Советот за креирање политики.
Всушност, Миле Зечевиќ кој е генерален секретар на владејачката СДСМ поднел оставка од функцијата независен член на Надзорниот одбор на Стопанска банка АД Битола. Меѓутоа, со оглед на тоа дека граѓаните претежни читаат само наслови, на социјалните мрежи имаше „мала вмровска прослава“ дека „почнале оставките во владејачката партија“!
Намигнување, бакнежи и партиски театар
Граѓани се почесто гледаат аматерски театар, отколку вистинска конструктивна дебата во Собранието. Тие заслужуваат достојно однесување од своите избраници, а не срамни потези за евтини и партиски манипулации. Една од последните „претстави“ во Собранието е кога за време на седницата за пратенички прашања (на 28.09.2023), пратеничката на ВМРО-ДПМНЕ Дафина Стојаноска, го обвини вицепремиерот (која го нарече и евро-вицепремиер) за евроинтеграции Бојан Маричиќ дека наводно ѝ испраќал бакнежи и ѝ намигнувал зад грб.
„Бакнежи и намигнувања само по дома да си праќаш, лигав еден. На што личи ваквото несоодветно однесување на вицепремиерот за евроинтеграции Бојан Маричиќ?!“, урлаше од собраниската говорница, пратеничката Стојановска.
Вицепремиерот Бојан Маричиќ веднаш најостро ги демантираше како што рече, недостојните и ниски лаги на пратеничката Стојаноска.
„Со пратеничката ниту сум имал било каква комуникација ниту сум ѝ испратил било каква вербална или гестикулативна порака. Ништо од тоа. Дефина Стојаноска денеска им нанесе срам на сите пратеници, на цел Парламент и пред сѐ на нејзината партија. Сепак, најголемиот срам си го нанесе себеси“, рече Маричиќ.
Пратеничката група на ВМРО-ДПМНЕ ја окупира пратеничката говорница и побара оставка од Маричиќ.
Дали имало бакнежи и намигнувања јавноста немаше прилика да види, останува на граѓаните да одлучат дали ќе и веруваат на пратеничката Стојановска или ќе му веруваат на Маричиќ дека не и намигнувал ниту и праќал некакви бакнежи.
ЦМТ
