Додека опозициската ВМРО-ДПМНЕ е зафатена со внатрепартиски битки меѓу актуелниот претседател, Христијан Мицкоски и поранешниот Никола Груевски, рејтингот на премиерот и претседател на СДСМ, Димитар Ковачевски е во постојан раст.
За неполни две години од седнувањето на „жешкото столче“ станува најпопуларен политичар во земјава, покажува последната анкета на „Фокус“.
Според резултатите од анкетата, Ковачевски е омилен политичар на 12,8 отсто од испитаниците, со што е попопуларен од Груевски и Мицкоски, кои имаат 11,1, односно 10,5 отсто поддршка од граѓаните.
Успешното справување со енергетската и економската криза очигледно го подигнаа рејтингот на премиерот Ковачевски.
Од друга страна, внатрешниот раздор и јавните расправии меѓу актуелниот и поранешниот претседател на ВМРО-ДПМНЕ, Мицкоски и Груевски, покажуваат намалување на рејтингот на опозициската ВМРО-ДПМНЕ.
Откако Никола Груевски и Христијан Мицкоски започнаа да се препукуваат во јавноста, започна да слабее рејтингот на ВМРО-ДПМНЕ, но и видлив стана раздорот и можноста за нова политичка опција поддржана од Груевски.
Според последната анкета на „Фокус“, прва по раздорот во ВМРО-ДПМНЕ, Груевски ужива поголема доверба од Мицкоски, што само ги засилува шпекулациите дека експремиерот би можел да поддржи нов политички субјект кој ќе настапи со сопствени листи на изборите.
