Светските лидери бараат правда за киднапираните украински деца. Првата средба на Меѓународната коалиција на земји за враќање на украинските деца се одржа на 8 декември во Кијив. Средбата се одржа на локација што не беше јавно објавена, под засилени мерки на безбедност, особено затоа што веќе втор ден трае воздушната тревога во главниот град на Украина, поради ракетните напади од рускиот агресор. За овој меѓународен настан, како и за воздушните напади, меѓу првите во светот, ексклузивно пишуваше ЦИВИЛ МЕДИА.
Инаугуративниот собир на Коалицијата го отвори претседателот на Украина, Володимир Зеленски.
„Присилната депортација е едно од најциничните злосторства во оваа војна. Децата не се само ‘одземени’ од окупираните територии на Украина. Русија намерно се обидува да ја прекине секоја врска што децата ја имаат со Украина, со нивните роднини и нивните најблиски. Обидете се да го вратите контактот со нивните семејства“, порача украинскиот претседател.
На #BringKidsBackUA присуствуваа претставнички и претставници на 72 држави и меѓународни организации. Тие ја покажаа силната решеност на меѓународната заедница за преземање итни и решителни чекори за враќање на украинските деца кои рускиот агресор насилно ги депортира, раселува, киднапира и русифицира уште од 2014 година, а особено интензивно по почетокот на целосната инвазија во 2022 година.
Претставници од Северна Македонија на овој важен меѓународен настан беа заменик правобранителот Јован Андоновски и претседателот на ЦИВИЛ, Џабир Дерала. Тие одржаа голем број билатерални средби со дипломати, високи државни функционери и меѓународни организации од повеќе земји на Европа и светот.
„Исклучително е важно да се работи заедно на развојот на механизмите на меѓународното право кои ќе овозможат враќање на децата. Ова прашање е итно. Оваа работа мора брзо да се заврши, бидејќи децата растат, а Русите ќе продолжат да ги прават овие злосторства“, изјави Андриј Јермак, шеф на кабинетот на претседателот Зеленски.
Конкретно, солидарност и поддршка за Украина во враќањето на депортираните и киднапираните деца изразија претседателот на Португалија Марсело Ребело де Соуса, претседателот на Литванија Гитанас Наузеда, претседателката на Словачка Зузана Чапутова, премиерот на Ирска Лео Варадкар и Министерката за надворешни работи на Канада Мелани Џоли, како и многу други лидери на држави и организации.
Создавањето на Меѓународната коалиција на земји за враќање на украинските деца беше иницирано за време на состанокот на советниците за национална безбедност и надворешна политика во Малта за спроведување на Формулата за мир на украинскиот претседател Володимир Зеленски.
Целта на првиот состанок на Коалицијата на 8 декември во Кијив е да се утврдат практичните чекори на земјите-членки за поддршка на Украина во нејзината мисија да ги врати депортираните и насилно раселените деца дома. Исто така, собирот има цел да ги ангажира земјите од Коалицијата во спроведувањето на конкретни проекти и обврски за да се обезбеди репатријација, рехабилитација и интеграција на засегнатите деца.
На средбата, Коалицијата ја презентираше Декларацијата за враќање на нелегално депортираните и насилно раселените украински деца во Украина, која е отворена за пристапување на други држави и меѓународни организации.
Според документот, потписниците се согласуваат да ги вложат сите можни напори за репатријација на децата кои беа незаконски депортирани од Руската Федерација. Декларацијата, исто така, се обврзува да го поддржи процесот на повторно обединување на овие деца со нивните семејства и нивно сместување во семејни средини. Понатаму, Декларацијата вклучува одредби за обезбедување на сета неопходна хуманитарна, медицинска и психолошка помош на децата и нивните семејства кои претрпеле илегална депортација.
Дополнително, Декларацијата ја истакнува поддршката за меѓународните напори да се повикаат на одговорност одговорните за организирање на нелегалната депортација и раселување на украинските деца.
Деск на ЦИВИЛ МЕДИА
