Американскиот претседател Џо Бајден за време на вчерашниот говор во Белата куќа предупреди дека укинувањето на финансиската помош за Украина може да доведе до криза во балканските земји.
„Ако ние заминеме, а Русија го издржи нивниот напад и ја победи Украина, што мислите дека ќе се случи во балканските земји? Што мислите дека ќе се случи од Полска до Унгарија?, праша Бајден.
Главните соработници на Бајден отворено им кажаа на пратениците на средбата во средата дека ако Конгресот наскоро не одобри дополнителна воена помош за Украина, Русија би можела да ја добие војната за неколку недели – во најдобар случај за неколку месеци, пишува NBC News.
Советникот за национална безбедност Џејк Саливан и директорката на Националното разузнавање Аврил Хејнс тогаш изјавија дека не е случајно што Путин го изврши најголемиот воздушен напад од почетокот на инвазијата на Украина, откако Конгресот не одобри дополнителна помош минатиот месец.
Белата куќа на 27 декември објави конечно намалување на количеството на оружје и воена опрема за Украина. Иако европските нации, вклучително и Велика Британија и Германија, обезбедуваат одредена финансиска поддршка, САД се најголемиот снабдувач на Украина со воена помош. Но, републиканците во Конгресот задржуваат десетици милијарди долари во идното воено финансирање за Кијив. Се додека Конгресот не го одобри тоа, нема да има повеќе поддршка.
Конгресот одобри повеќе од 110 милијарди долари помош за Кијив од почетокот на руската инвазија, но не одобри никакви средства откако републиканците ја презедоа контролата врз Претставничкиот дом во јануари 2023 година.
Украинскиот претседател Володимир Зеленски и Бајден го повикуваат Конгресот да одобри нов пакет помош од 61,4 милијарди долари, но републиканците одбиваат да ја одобрат помошта без договор со демократите за зајакнување на безбедноста долж границата меѓу САД и Мексико. Но, дури и републиканците да попуштат и да се согласат да ја продолжат помошта, таа веројатно би била значително помала.
Без дополнителна американска помош, проценуваат западните власти, Украина прво би останала без ракети со долг дострел, потоа ракети за противвоздушна одбрана, а подоцна и артилериска муниција и ракети со краток дострел, како што се противтенковските ракети Javelin и противвоздушни ракети Stinger.
Зеленски има проблеми и со обезбедување дополнителна воена помош од Европската унија. Имено, новата програма за помош на ЕУ вредна 50 милијарди евра за следните четири години требаше да биде договорена лани во декември. Унгарскиот премиер Виктор Орбан стави вето на планот, доведувајќи ја во прашање корисноста на помошта за Украина и велејќи дека одлуката на ЕУ да ги замрзне средствата наменети за неговата земја е погрешна.
Но, претставниците на земјите-членки пред десет дена со мнозинство гласови во Брисел одлучија да започнат преговори со Европскиот парламент за плановите за помош. Целта е да се овозможи што поскоро спроведување на програмата за помош по евентуалното попуштање на Орбан.
Доколку наскоро не се најде решение со Унгарија, другите членки на ЕУ имаат намера да дејствуваат како група од 26. За 1 февруари е најавен специјален самит на ЕУ за тоа како да се продолжи понатаму. Брисел се надева дека Унгарија ќе се откаже од отпорот за да се избегнат натамошни компликации.
Г. Т.
