„Споделувајќи ја загриженоста на Европската комисија, ВМРО-ДПМНЕ јавно прашува кој и како им се заканувал на меѓународните преставници во Република Македонија и да се посочи конкретен пример за тоа“, се вели во соопштението на Центарот за комуникации на партијата, објавено во дел од провладините медиуми.
„ВМРО-ДПМНЕ осудува говор на омраза и повици за насилство, и тоа треба да го направат и сите останати политички чинители. Споделувајќи ги демократските вредности, очекуваме допрецизирање и појаснување за таквите наводи, со цел надлежните институции поефикасно да превенираат такви случаи“, се наведува во соопштението на ВМРО-ДПМНЕ.
Партијата и во претходното соопштение го осуди објавувањето и ширењето на некролози за меѓународните претставници во Македонија, оценувајќи дека „ваквиот акт е целосно неприфатлив и недозволен и во иднина мора да сопре“ и побара од надлежните органи да преземат соодветни мерки.
Откако Европската комисија вчера „цврсто ја осуди секоја запаллива и опасна реторика, како и таргетирање на претставниците на меѓународната заедница во Скопје“, и потенцираше дека опасната реторика ја поместува Македонија уште подалеку од евроатлантскиот пат, денес реагираше и Синдикатот на македонската дипломатија, кој во соопштението наведе примери кога државни функционери „отворено ги навредуваат, омаловажуваат, па дури им се закануваат на странските претставници што беа инволвирани во ‘Пржинскиот договор’, инаку уредно потпишан и од политичката партија на која тие функционери припаѓаат“.
Откако поранешниот посредник во Договорот за Пржино, Питер Ванхојте реагираше на објавувањето на идентитетот на претставничката на СДСМ во Избирачкиот одбор на спорното избирачко место во Теарце, директорот на Државниот архив Филип Петровски, истакнат член на ВМРО-ДПМНЕ, му одговори: „Средете си ги работоите во вашата држава која во моментов е легло на ИСИС, а пред 100 години, држава која организираше масовни убиства во Африка. Седете си дома, доста ни е од вас!“.
Филип Петровски и Питер Ванхојте
Петровски со зурли и тапани во фон, пред објектот на ДИК, отворено му се закани и на неименуван амбасадор, кому му упати „личен поздрав“: „Не ги закрвувај односите на двете држави, одлични се и ги градиме четврт век, Ти си, и онака, на заминување, ќе дојде нов амбасадор кој ќе ја почитува повеќе Македонија. Тргни се од ДИК, не им давај сила да прават немири, не ни треба нов Таксим и нов Киев! Во Македонија победи македонскиот народ! И немој да го провоцираш веќе!“
Еден од провладините портали, пишувајќи за тој настан, го објави текстот со наслов „Амбасадата еднаш гореше, Бејли исплашен дека може да се случи и втор пат!“, во кој го „дообјасни“ Петровски.
