Во недела истекува рокот кога Никола Груевски треба да објави дека има коалиционен партнер и да го претстави составот и програмата на новата влада или да го врати мандатот. Со враќањето на мандатот, Иванов повторно треба да го додели мандатот.
„Тој договор има пет точки, а во петтата точка се вели дека по надминувањето на кризата и по враќањето на ДУИ во Собранието ќе се разговара за формите на составување на влада. Значи, не е прецизен. Тоа во овој момент е тешко да се спроведе или речиси е неспроведливо, со оглед на фактот што тоа не се подразбира на прецизен начин, таму не е прецизирано дека треба да имаме две јасни мнозинства. Тргнувајќи од фактот дека ние немаме апсолутен легитимитет за спроведување на овој принцип, тоа е многу тешко да се спроведе“, е ставот на потпретедателката на ДУИ, Теута Арифи, осврнувајќи се на Мајскиот договор, склучен во 2007 година. Според неа, не е наведено дека коалиција мора да прават партиите од македонскиот и албанскиот блок кои освоиле најмногу пратенички мандати на изборите.
Арифи изјавата ја даде на само четири дена пред истекување на рокот во кој, Никола Груевски, по доделувањето на мандатот од претседателот Иванов, треба да состави влада.
За јавноста не се достапни официјални информации за тоа до каде се преговорите меѓу Груевски и Али Ахмети, како лидер на ДУИ, партија која освои најмногу гласови на албанските партии на предвремените парламентарни избори.
Тоа што официјално се знае е дека, тие двајца оствариле една средба, како и дека Ахмети се сретнал и со Зоран Заев, лидерот на СДСМ. Детали за тоа што се разговарало на средбите, од партиите не споделуваат.
Исто така, Ахмети одржал и одвоени средби со членовите на потесното раководство на партијата. Неофицијално, потпретседателите на ДУИ, во однос на коалицирањето со ВМРО-ДПМНЕ имаат различни ставови.
ДУИ како основа за коалицирање ја поставува Платформата која, по разговорите со премиерот на Албанија, Еди Рама, ја потпишаа со партијата Беса и со колаицијата Алијансата за Албанците. ВМРО-ДПМНЕ, пак, излезе со јасен став дека неколку од точките од Платформата, како двојазичноста и продолжувањето на мандатот, се неприфатливи за нив.
Македонската јавност не е единствена која е во неизвесност во однос на тоа кој ќе ја формира следната влада. И меѓународната заедница постојано го следи процесот на преговори и инсистира на брзо формирање на владата. Европарламентарецот Иво Вајгл, ја претстави Предлог-Резолуцијата за Македонија. „Европарламентот повикува на брзо формирање на новата влада, со цел да се искористи мандатот за да се продолжи со потребните реформи и смета дека е од суштинско значење меѓупартиската соработка за решавање на домашните предизвици и на предизвиците поврзани со ЕУ. Европарламентот заклучува дека изборниот процес е подобрен, вклучувајќи ги и законските рамки, избирачките списоци и медиумската средина“, се вели во Предлог – Резолуцијата.
„Основна задача за новата влада е да го промени она што Европската комисија го нарече ‘заробување на државните институции’. Тоа е огромна задача, не е само за носење на закон овде-онде, туку за промена на однесувањето на институции и поединци. Така што ќе треба време и координиран напор. Добрата вест за Македонија е што тоа со одредена јасност и детали е поставено во Извештајот за напредокот на ЕК, како и во итните реформски приоритети во Извештајот на Прибе, и во Договорот од Пржино“, изјави британскиот амбасадор Чарлс Гарет.
„Се надевам дека наскоро ќе биде формирана новата влада, подржана од мнозинството, со цел да продолжи да отвора европски перспективи за земјата, за да можеме набрзо да ги започнеме преговорите за членство и поглавјата за преговори. Но, за тоа да се случи, потребно е да се исполнат некои услови. Тоа ќе биде можно само ако има широко парламентарно мнозинство кое ќе ја поддржи владата на оваа земја. Само тогаш можат да бидат донесени потребните мерки“, изјави европскиот комесар Јоханес Хан, во обраќањето пред Парламентарното собрание на Советот на Европа во Стразбур.
