Германец осуден на смрт во Белорусија се појави на државната белоруска телевизија, во солзи и ја моли германската влада да интервенира во неговиот случај.
„Господине Шолц, ве молам, сè уште сум жив… сè уште не е доцна“, рече Рико Кригер, кој беше сликан со лисици во ќелијата, апелирајќи до германскиот канцелар Олаф Шолц, пишува Гардијан.
Властите во Белорусија, диктаторска држава во која се шират тортурата и политизираните судења, тврдат дека Кригер (30) отпатувал во земјата минатата есен по наредба на украинското разузнавање, со цел да изврши терористички напад на железничка пруга.
„Ова беше најголемата грешка во мојот живот. Ја признавам својата вина, без сомнение“, рече Кригер во дел од интервјуто каде што оригиналниот германски се слушаше под преводот на руски јазик. Во неколку моменти за време на 17-минутната телевизиска програма тој се расплакал.
КГБ, како што сè уште е позната белоруската тајна служба, има досие за фалсификување докази и извлекување признанија под тортура, што фрла сомнеж во веродостојноста на тврдењата изнесени во програмата. Не беа обезбедени докази за наводните злосторства на Кригер.
Белорусија е единствената европска земја која ја задржува смртната казна. Егзекуциите се изведуваат со куршум во задниот дел од главата; посмртните останки се закопани тајно во необележан гроб, пишува Гардијан.
Можно е Белорусија, близок сојузник на Русија, да се надева дека ќе го вклучи Кригер во размената на заробеници меѓу Русија и Западот, која се дискутира веќе неколку месеци. Изгледа дека телевизиското признание е дизајнирано да изврши притисок врз германската влада.
Русија затвори голем број американски граѓани, вклучително и дописникот на Волстрит журнал Еван Гершкович, а Путин сигнализираше дека е заинтересиран за договор со кој руските шпиони и атентатори затворени во странство ќе бидат вратени во Москва во замена за западните затвореници во Русија.
Германските власти не ги коментираа гласините за размена, но германското Министерство за надворешни работи претходно соопшти дека тие му обезбедуваат конзуларна помош на Кригер и „интензивно работат со белоруските власти во негово име“.
Во петокот, портпаролката на германската влада Кристијане Хофман рече дека Шолц бил запознаен со случајот. „Како и целата влада, [тој] е загрижен за овие настани, особено во врска со смртната казна“, рече таа на прес-конференција во Берлин.
Ј. Ѓ.
