Патувањето на ЦИВИЛ – Центар за слобода сиве овие 25 години од нашето основање во македонското општество, ако може накратко да се опише најсоодветно би требало да се каже дека беше исклучително тешко или малку жаргонски речено „оф-роуд“. Тоа е така бидејќи станува збор за секојдневна макотрпна работа од четвртина век од нашето основање. Работа исполнета со безброј предизвици на дневна основа во која ЦИВИЛ беше активен секој ден. За сето ова време испорачавме над стотици успешни проекти, организиравме безброј настани и изградивме медиумска платформа која прерасна во важен јавен простор за политички дијалог и еден од темелите на општествениот дискурс. Ова меѓу другото го истакна претседателот на ЦИВИЛ, Џабир Дерала при неговото гостување во „Слободен печат“.
– Нашето патување е далеку од завршено, и ние со нетрпение ќе се соочиме со уште поголемите предизвици, но и достигнувања што се пред нас. Како организација се нафативме да работиме со најтешките, најделикатните теми кои предизвикуваат страв и поделби во општеството поради кои се обидуваме да ги премостиме и да ги донесеме луѓето, поединците, но и групите како и другите чинители на една маса да разговараат за решенија – вели Дерала и воедно се заблагодарува до сите оние кои ја поддржаа Организацијата и учествуваа во нејзината мисија сиве овие години.
Дерала посочува дека напорите на Центарот за слобода допреа илјадници животи низ сите заедници, надминувајќи ги етничките, верските, политичките и социјалните граници.
Како што појасни претседателот на ЦИВИЛ и главен уредник на медиумската платформа на организацијата, 25-годишниот јубилеј организацијата сепак работно го поминува и тоа со организирање на голема меѓународна конференција именувана „Одбрана на демократијата и човековите права во услови на војна, национализам и авторитаризам“ што ќе се одржи во Скопје, на 11 и 12 декември.
– На меѓународната конференција се очекува учество на повеќе од 25 говорници и тоа од 11 земји, дел од Европа, САД но и Македонија. Конференцијата има интересен концепт, а темите за дискусија ќе бидат поделени во четири панели и тоа: Демократијата под опсада, растот на крајно-десничарскиот национализам, авторитарните тенденции во Европа и светот како и последниот панел кој ќе се однесува на граѓанското општество и медиумите, што тие можат да направат за одбрана на демократијата – појаснува Дерала.
Претседателот на ЦИВИЛ објаснува дека конференцијата не е изолиран настан, туку е иницијатива на ЦИВИЛ и германските партнерски организации „Медиа Дијалог“ и „Youth4Media“, поддржана од Владата на германската сојузна покраина Северна Рајна-Вестфалија. Според Дерала, конференцијата во Скопје се најде на светската мапа на настани по повод датумите за одбележување на човековите права и слободи, и е дел од официјалната програма на Неделата на човекови права, иницијатива на Северна Рајна-Вестфалија.
Извор: Слободен Печат
Фото: Слободен Печат / Драган Митрески
