По убедливата изборна победа, Студентската листа во Србија ги претстави приоритетите на идната влада: борба против корупцијата, ревизија на државните договори, враќање на незаконски стекнатиот имот и професионализација на институциите. Најавена е и нова истрага за трагедијата во Нови Сад, која го поттикна историскиот студентски бунт.
Според прелиминарните резултати на Републичката изборна комисија, Студентската листа освои 140 од 250 пратенички места. По повтореното гласање на 53 избирачки места на 1 ноември, се очекува официјалното завршување на изборниот процес, по што следуваат конституирањето на парламентот и формирањето на владата.
Првите 30 дена: Економска стабилност и енергетска сигурност
Академикот Радомир Саичиќ, претставник на Студентската листа, во интервју за НИН најави дека новата влада најпрво ќе обезбеди стабилност на динарот, редовна исплата на платите и пензиите и сигурно снабдување со енергенси.
Предвидени се разговори со Вашингтон за американските санкции кон Нафтената индустрија на Србија (НИС), како и со Москва за снабдувањето со руски гас. Најавено е и усвојување транспарентен буџет за 2027 година.
Првите 100 дена: Декриминализација на државата
Саичиќ најавува ревизија на големите инфраструктурни проекти, објавување на спорните државни договори, реорганизација на јавните претпријатија и прекин на партиските вработувања.
Особено значајна е најавата за замрзнување и одземање на незаконски стекнатиот имот на функционерите и партиските финансиери, преку соодветни правни постапки.
Меѓу приоритетите е и утврдувањето на одговорноста за уривањето на настрешницата на железничката станица во Нови Сад, каде што загинаа 16 лица.
Владеење на правото, а не политичка одмазда
Носителот на Студентската листа, Илија Срдановиќ, во интервју за Радио Слободна Европа нагласи дека новата власт ќе постапува според Уставот и законите, без политички реваншизам. Најави продолжување на европските интеграции и реформи во правосудството и медиумите.
Сепак, политичката транзиција веќе отвора сериозни прашања. Како што анализираше ЦИВИЛ МЕДИА на 1 ноември, апсењето на високиот полициски функционер Марко Кричак покажува дека превирањата во институциите започнаа пред формалната смена на власта.
Б. Јордановска
