„Смртта на Фросина е пропуст на системот“; „Вози на бензин не на промили!“; „Една чашка, една грешка, еден живот“; „Сите одиме кај ист судија, а таму има само една правда“; „Обвинители = соучесници убијци“; „Не е несреќа, туку убиство“; „Не е кобно местово, туку луѓето и системот“; „Без казна и вашите раце се крвави“; „Врските не враќаат човечки живот“; „Одговорност“, беа дел од пораките што стотиците граѓани ги испратија на денешниот мирен собир на булеварот „Партизански Одреди“, каде што на пешачки премин беше прегазена 22-годишната Фросина Кулакова, од 20-годишниот Васил Јованов, кој возел под дејство на алкохол и без возачка дозвола со 130 километри на час и поминал на црвено.
„Пораз за нас и за нашето општество е тоа што институциите дозволуваат човек кој што има 5-6 кривични пријави да помине неказнето и да го ослободуваат. Поразително е тоа што секој ден слушаме за нова жртва и на нова раскрсница да положуваме цвеќе. Одговорност треба да има и од семејството кој му дозволи да вози без возачка дозвола, но, треба да почнеме од системот да се менува“, вели еден граѓанин.
„До некаде и дечкото не е виновен што ја прегази девојката, неговите се виновни што му купиле кола и му дозволиле да вози без возачка дозвола. Сакаме да биде осуден и да заврши во затворот Идризово за да ја осети болката“, велат граѓанките.
Голем број од граѓаните запалија свеќи и оставија цвеќе пред фотографијата на младата Фросина оставена на местото на несреќата.
Денеска мирен собир е закажан и во Неготино во 15 часот, а во недела во Кавадарци.
Текст, фото и видео: Дехран Муратов
Монтажа: Ариан Мехмети
