Во ова издание на подкастот Текови (Currents) разговараме со Адмир Лисица, историчар и истражувач, специјализиран во областите политичка историја, меѓународна политика и заедници во дијаспората. Автор е на четири книги, меѓу кои „Приказни од дијаспората и бошњачката емиграција“ и бројни научни трудови. Во моментов Лисица ги анализира изборните процеси и радикалниот десничарски раст во Европа. Тој е директор на Центарот за геополитички истражувања „Геопол“ со седиште во Сараево.
Нашиот соговорник е запаметен и по неговото учество на меѓународната конференција „Одбрана на демократијата и човековите права“ што се одржа минатиот декември во Скопје, но и во неколку други интервјуа за ЦивилМедиа, меѓу кои и тоа каде што тој не ги крие мрачните прогнози за тоа што може да се случи ако плановите на лидерот на Република Српска, Милорад Додик, се реализираат.
Во подкастот, во кој разговараме на босански јазик, Лисица одговара на голем број прашања за актуелните состојби во БиХ, регионот Западен Балкан, светот и Украина.
Тој зборува за состојбата во БиХ во овој период, особено по пресудата на судот на БиХ за Додик, според која тој е прогласен за виновен поради непочитување на одлуките на високиот претставник во БиХ. Тој е осуден на една година затвор условно, но и шестгодишна забрана за вршење политичка функција како претседател на РС, што е особено значајно. Лисица говори за реакциите во јавниот, политичкиот и медиумскиот сектор по оваа пресуда, истакнувајќи дека тоа е победа на државата БиХ, што се совпаѓа и со ставот на Џелал Хоџиќ, претседател на СДА Македонија, кој претходно даде интервју за ЦивилМедиа.
Нашиот соговорник во детали говореше за политиката на Србија кон соседните земји, за хегемонизмот, во историски рамки и денес. Тој тврди дека дури и поранешниот премиер Зоран Ѓинѓиќ, чиј премиерски мандат, започнат во 2001, беше прекинат со атентатот во 2003 година, не се разликувал многу од тие што дојдоа по него по прашањата за БиХ, како и за Косово.
Посебно интересни се согледувањата на Адмир Лисица во доменот на процесите за соочување со минатото, кои ги оценува дека се, за жал, многу далеку од тоа како тие процеси се одвивале во Европа, давајќи го примерот на Германија и Франција.
Неизбежно, разговаравме и за тоа како политиката на новиот американски претседател Доналд Трамп влијае врз БиХ и регионот и за тоа какви се перспективите на Балканот во овој контекст. Воедно, стана збор и за политиката на ЕУ во овој период, каде што уште еднаш го разгледавме ставот што Лисица го изнесе на меѓународната конференција „Одбрана на демократијата и човековите права“ во Скопје, кога изјави дека ЕУ не ѝ дава поддршка на Босна во овој клучен период и дека е потребна цврста одлука на ЕУ во политиката на проширување.
На крајот, разговаравме и за перспективите на Украина и нејзината борба за ослободување. Тој е скептик дека Украина ќе дојде до целта – слобода на целата територија и воспоставување одржлив мир, при што со критички поглед се осврна на политиката на Трамп. Што се однесува до позициите изнесени од европските лидери и премиерот на Канада, Џастин Трудо, нашиот соговорник смета дека тоа е значајно, но се прашува дали Украина ќе издржи.
Разговорот го водеше: Џабир Дерала
Камера и монтажа: Ариан Мехмети
