Француските маринци денеска отвориле оган врз пет неидентификувани дронови кои прелетале над базата Île Longue во Бретања, еден од најчуваните воени објекти во Франција и централна точка на нејзиниот нуклеарен одбранбен капацитет. Инцидентот, кој се случил попладнево, го потврдија регионалната жандармерија и Министерството за одбрана, објави Euronews.
Безбедносните сили задолжени за базата веднаш ги активирале протоколите за одбрана од беспилотни летала и испукале неколку рафали кон дроновите. Засега не е познато дали некој од нив бил погоден. По интервенцијата била покрената широкa акција за пребарување на подрачјето.
Базата Île Longue е дом на четирите нуклеарни балистички подморници на Франција – Le Triomphant, Le Téméraire, Le Vigilant и Le Terrible – кои ја формираат основата на националниот нуклеарен одвраќачки потенцијал. Најмалку една од нив постојано патролира во океаните како дел од стратегиската одбранбена доктрина.
Министерката за одбрана, Катрин Вотрен, го потврди пресретнувањето, но не откри детали за употребените мерки. „Секое прелетување над воен објект е строго забрането. Сакам да ја пофалам реакцијата на нашите сили на базата Île Longue“, изјави таа.
Регионалните власти наведоа дека критичната инфраструктура не била загрозена. Воениот обвинител во Рен денеска ќе отвори формална истрага за инцидентот. Министерството за одбрана сè уште нема објавено информации за потеклото на дроновите или можните одговорни актери, повикувајќи се на безбедносни протоколи.
Инцидентот претставува ескалација во однос на претходните неовластени прелетувања во регионот. Во средината на ноември беа забележани дронови над полуостровот Крозон, но тие не влегле во воен воздушен простор. Европските држави во последните месеци регистрираа пораст на мистериозна активност со беспилотни летала, кои во неколку случаи доведоа до затворање аеродроми или беа детектирани во близина на воени објекти.
Паралелно со тоа, Русија е инволвирана во повеќе повреди на воздушен простор на ЕУ, меѓу кои и инциденти во Естонија и Полска.
