Според претседателот на СДА Македонија, Џелал Хоџиќ, доколку владата продолжи со, како што ја нарече, изолационистичка политика и со политики кои ја поткопуваат европската перспектива на државата, Северна Македонија ризикува дополнително економско заостанување.
„Додека владината пропаганда се обидува да ја убеди јавноста дека македонската економија бележи раст, реалните економски показатели и релевантните анализи покажуваат сосема поинаква слика – граѓаните на Северна Македонија денес имаат понизок квалитет на живот од граѓаните во Босна и Херцеговина, Србија, Црна Гора и Албанија“, изјави Хоџиќ за ЦИВИЛ МЕДИА, по соопштението што го објави неговата партија денеска.
Разликата станува уште поочигледна кога ќе се споредиме со земјите од Европската унија во нашето соседство. Квалитетот на живот на нашите граѓани одамна не може да се споредува со оној во Хрватска, Грција и Бугарија.
„Наместо да се приближуваме кон тие стандарди, ние се оддалечуваме и од регионалниот просек“, посочи Хоџиќ.
Според првиот човек на СДА Македонија, стандардот на граѓаните на земјава, за неколку години нема да може ни да се споредува со оној на земјите во регионот.
„Ако оваа политика продолжи, за неколку години стандардот на граѓаните на Северна Македонија нема да може да се споредува ниту со стандардот во Црна Гора и Албанија, особено кога тие држави ќе го продолжат својот европски пат и ќе станат дел од Европската унија. Тоа би значело дека наместо да се движиме напред, ние ќе останеме заглавени во изолација и економска стагнација“, изјави Хоџиќ.
Претходно, од партијата СДА Македонија обвини дека изолационистичката политика на владата ја води македонската економија кон сериозна криза и пад на животниот стандард на граѓаните.
Според партијата, блокираниот европски пат на Северна Македонија ја вовел државата во општествена криза која веќе има негативно влијание врз економијата. Од СДА Македонија тврдат дека, и покрај владините тврдења за економски раст, релевантните анализи покажуваат дека квалитетот на живот на граѓаните во земјата е понизок во споредба со граѓаните во Босна и Херцеговина, Србија, Црна Гора и Албанија.
Од СДА Македонија истакнуваат дека минималната плата во Северна Македонија е пониска од минималната плата во Босна и Херцеговина, Србија, Црна Гора и Албанија.
Во соопштението се наведува и дека странските инвестиции во 2025 година изнесувале 467,5 милиони евра, што според СДА Македонија претставува пад од 61% во споредба со 2024 година.
Од партијата оценуваат дека ваквите економски показатели се резултат на, како што велат, „неодговорна владејачка структура која неуспесите ги прикрива со националистичка реторика“, додека економијата се соочува со сериозни предизвици.
ЦМ Деск
