ЦИВИЛ е во постојана и секојдневна комуникација со стотици граѓанки и граѓани од целата земја. Пред неполни две години, беше воспоставена уште една форма на директна комуникација со јавноста – ПРАШАЊЕ НА ДЕНОТ, кое од понеделник до четврток отвора актуелни теми и прашања од јавен интерес.
Прашањата се однесуваат на политички, социјални, економски и општествени теми, но и на секојдневни проблеми со кои се соочуваат луѓето. Одговорите се отворени, директни и често мошне јасни. Бројот на коментари најчесто се движи од неколку десетици до неколку стотици дневно, а во повеќе прилики интересот беше толку голем што бројот на одговори надмина и илјада коментари за само еден ден.
Се разбира, оние што сакаат да споделат сензитивни информации, искуства и ставови, тоа можат да го направат и преку пораки на Фејсбук или по мејл на info@civil.mk. Идентитетот на тие што сакаат да останат анонимни се заштитува во најголема можна мера, а нивните информации често се основа за новинарски истражувања и стории.
На крајот на работната недела, секој петок, Прашањето на денот има форма на ГРАЃАНСКИ ФОРУМ и гласи:
ПРАШАЊЕ НА ДЕНОТ / ГРАЃАНСКИ ФОРУМ: Која е вашата порака, барање или прашање до политичарите?
Ова прашање е намерно широко и отворено. Граѓанките и граѓаните сами одлучуваат што е најважно за нив: проблем во институциите, неправда, сиромаштија, корупција, локален проблем, лична приказна, барање за одговорност, прашање до владата, опозицијата, градоначалниците, пратениците или политичарите воопшто.
Граѓанките и граѓаните одговараат гласно и јасно. За жал, секоја недела, особено во петочниот Граѓански форум, коментарите откриваат гнев, разочараност и недоверба кон нефункционалните институции и празните ветувања на власта. Но, многу често, тие изразуваат и длабоко разочарување од опозицијата, од партиите и од политичарите воопшто.
Во тие коментари се гледа реалниот живот: луѓе кои се борат со ниски плати, пензии, високи цени, бирократија, неправда, партизација, корупција и институции што не одговараат. Се гледаат и разочарувањето, гневот, иронијата, но и потребата некој конечно да ги слушне.
Овие гласови се важни за одржување на демократската јавна дебата. Прашањата, критиките, сведоштвата и пораките на граѓанките и граѓаните не се „шум“ во јавниот простор. Тие се суштината на демократијата. Без нив, политиката се претвора во затворен круг на партиски пораки, пропаганда и празни настапи.
ЦИВИЛ го отвора овој простор токму затоа што јавноста мора да има место каде што може да праша, да реагира, да посочи, да побара одговор и да сподели искуство. Секое прашање е важно. Секој проблем, колку и да изгледа мал, може да открие голема неправда. Секоја порака може да биде почеток на поширока јавна дебата.
Политичарите имаат обврска да слушаат. Институциите имаат обврска да одговараат. А граѓанките и граѓаните имаат право да прашуваат – секој ден, јавно, гласно и без страв.
Затоа, и овој петок, ЦИВИЛ прашува: Која е вашата порака, барање или прашање до политичарите?
Пишете, прашувајте, коментирајте, посочете проблем, споделете искуство, побарајте одговор.
Граѓанскиот глас е основа на критичката јавност.
ЦИВИЛ – Центар за слобода
Во ера на дезинформации, националистички популизам и авторитаризам, неопходна е вашата поддршка за ЦИВИЛ.
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА.
