Познатиот американски историчар и автор, Тимоти Снајдер, упати предупредување за опасностите од политичката реторика која ја исклучува можноста за алтернативи. Во својата најнова објава на социјалните мрежи, професорот од Универзитетот Јеил, истакнат по своите анализи на тоталитаризмот и одбраната на демократијата, се осврна на тоа како лидерите го користат чувството на неизбежност за да оправдаат екстремни потези.
„Една од најопасните реченици во политиката е: „Немаме избор“. Речиси секогаш постои избор, дури и ако секој избор е тежок. Откако лидерите ќе се убедат себеси дека историјата, револуцијата, националниот опстанок или некоја повисока кауза ги елиминирала сите алтернативи, речиси сè може да стане дозволено“, пишува Снајдер.
Неговата порака претставува важен потсетник во контекст на современите геополитички предизвици и хибридни закани. Наративите кои сугерираат отсуство на избор честопати се алатка на авторитарните режими и пропагандните мрежи, со цел да се суспендира критичкото размислување кај граѓаните и да се отвори патот кон неконтролирана моќ и кршење на човековите права.
ЦМ Деск
